ლიუტოსლავსკი ვიტოლდ
ვიტოლდ ლიუტოსლავსკი – (25. I. 1913, ვარშავა – 8.II.1994, ვარშავა), პოლონელი კომპოზიტორი. ე. ლეფელდისა და ვ. მალიშევსკის მოწაფე. 1932-55 გამოდიოდა როგორც პიანისტი, ხოლო 1935-იდან როგორც საკუთარი ნაწარმოებების შემსრულებელი დირიჟორი. XX სსუკუნიდ ერთ- ერთი გამოჩენილი კომპოზიტორია. ადრინდელი ნაწარმოებებიდან ცნობილია სიმფონიური ვარიაციები (1938). 40-იან წ. მუშაობდა ნეოკლასიკური სტილით (I სიმფ.). 60-იან წლებში დაამუშავა კომპოზიციის ახალი ტექნიკა: იყენებდა თავისუფლად გაგებულ 12 -ტონიან სერიას („სამგლოვიარო მუსიკა“ და სხვ.), შეზღუდულ ალეატორიკას („ვენეციური თამაშები“, სიმებიანი კვარტეტი, მე-2 სიმფ. „წიგნი ორკესტრისათვის)“, 70-80 წლების მუსიკა გამოირჩევა ემოციური დიაპაზონის გაფართოებით, ჟანრული კონკრეტობისადმი მიმართვით. 1962-იდან ასწავლიდა მრავალი ქვეყნის მუსიკალურ ცენტრებში. მრავალი აკადემიისა და უნტივერსიტეტის წევრი და საპატიო დოქტორია. კომპოზიტორის საერთაშორისო კონკურსების ლაურეატი (1959-1985), მთელი რიგი საერთაშორისო მუსიკალური საზოგადოების და ორგანიზაციის წევრი და ვიცე-პრეზიდენტი. ძირითადად მუშაობდა ინსტრუმენტულ (სიმფონიურ და კამერულ) და საგუნდო მუსიკის დარგებში.
