ვულკანუსი
NPLG Wiki Dictionaries გვერდიდან
ვულკანუსი – (რომ.) ცეცხლის რომაული ღვთაება, რომლის კულტიც ოდითგან იყო რომში გავრცელებული. მოგვიანებით იგი გააიგივეს ბერძნულ ჰეფესტოსთან.
ვულკანუსი გამანადგურებელი და განმწმენდელი ცეცხლის ღვთაება იყო. მას უძღვნიდნენ დამარცხებული მტრის საზეიმოდ დამწვარ იარაღს. ვულკანუსს მიიჩნევდნენ აგრეთვე ხანძართაგან მფარველ ღმერთად. რომაელთა რწმენით, ვულკანუსს შეეძლო ათი წლით გადაეწია ადამიანური ცხოვრების საბედისწერო წამი. მართალია, ვულკანუსი გააიგივეს ბერძნულ ჰეფესტოსთან, მაგრამ მისგან განსხვავებით, რომაელი ღმერთი არ მფარველობდა სამჭედლო საქმეს.
ყოველწლიურად, აგვისტოს თვეში, რომში იმართებოდა ვულკანუსისადმი მიძღვნილი დიდი ზეიმი – ვულკანალია. ვულკანუსის ტაძარი მდებარეობდა რომის ფორუმზე. ამ წმინდა ადგილს ვულკანალი ეწოდებოდა.
