თუშეთის ასკილი
NPLG Wiki Dictionaries გვერდიდან
თუშეთის ასკილი – (Rosa tuschetica Boiss.); ოჯახი: ვარდისებრნი (Rosaceae). დაბალი, 1-1.5 მ სიმაღლის ბუჩქია. ძლიერ დატოტვილი. ნორჩი ტოტები მოფენილია სწორი, დიდი და ნემსისებური ეკლებით. ყვავილიანი ტოტები კი ჯირკვლებითაც ხასიათდება. ფოთლები 5-7-ფოთოლაკიანია, ფოთოლაკები კვერცხისებურია, კიდეებზე ორმაგად ბასრხერხკბილა. ჯამის ფოთლებს აქვს ოდნავ ფოთლისებური გაფართოებები. გვირგვინის ფურცლები კაშკაშა ვარდისფერია. ყვ. ნაყ. VI-IX. იზრდება ქვიან ფერდობებზე სუბალპურ და ალპურ სარტყლებში. კახეთში მისი ნახვა შესაძლებელია თუშეთის დაცულ ტერიტორიაზე. გვხვდება ქართლსა და ხევსურეთში. საქართველოს ენდემია, მცენარე აღწერილია თუშეთში 1872 წელს.
