კვიტაიშვილი ემზარ

ემზარ კვიტაიშვილი

კვიტაიშვილი ემზარ — (1936), ქართველი პოეტი, მწერალი, ესეისტი. დაიბადა თბილისში. 1959 წელს დაამთავრა თსუ-ს ფილოლოგიის ფაკულტეტი. მისი პირველი ლექსები დაიბეჭდა 1957 წელს „ცისკარსა” და „პირველ სხივში”. 1963 წელს გამოქვეყნდა მისი პირველი კრებული - „გზაში ნათქვამი სიმღერა”. 1963 წლიდან ჟურნალ „ცისკარის” ლიტერატურულ მუშაკი იყო, ხოლო შემდეგ — შოთა რუსთაველის ლიტერატურის ინსტიტუტის ახალი ქართული ლიტერატურის განყოფილების მეცნიერ-მუშაკი. მისი კრებული „სიზმარი ვნახე” 1975 წელს გამოიცა, 1989 წელს _ კრებული „ახალი წელი ტყეში”, ხოლო კრებული „ნაშუადღევი” - 1999 წელს.

შენკენ მოვილტვოდი

(მთიელთა სიყვარული)

ბედი ჰქონია, გარგუნეს ვისაც...

ნეტავი თავი არ დამეზოგა −

ჯიუტი, შლეგი და ავი ზნისა,

შემოვხიზნოდი იმ შენს ეზო-კარს.

ზედიზედ, ვისგან გეყოლა ძენი,

მეძუძურს, ღვარად დაგდინდა ხსენი...

მეც მოვზიდავდი ფეხკავშას ლაგამს,

ნეტა ცხვარ-ძროხა მემწყემსა შენი.

დამამწუხრებდა უფრო სხვა რაღა...

ვის დარჩა ძველი ეზო და კალო?!.

ვაითუ დაჭკნი, ის აღარა ხარ,

თინიბეგაის თვალჭრელო ქალო!..

წყარო

ქართველი პოეტები (ენციკლოპედია)