კინომსახიობი
კინომსახიობი – მხატვრული ფილმის შექმნის შემოქმედებითი მონაწილე, სცენარის ერთ-ერთი მოქმედი პირის განმახორციელებელი.
თეატრისგან განსხვავებით კინემატოგრაფიული იერსახის შესრულება, როგორც წესი, მხოლოდ ერთხელ ხდება. ეს კიდევ უფრო ზრდის კინომსახიობის პასუხისმგებლობას. მსახიობისაგან კინო მოითხოვს უზადო მხატვრულ სიზუსტეს. სხვა სპეციფიკური სიძნელე ისიცაა, რომ ფილმს ისეთივე თანმიმდევრულად როდი იღებენ, როგორც შემდეგში უჩვენებენ. ამიტომაც, რომ შევინარჩუნოთ იერსახის მთლიანობა, ისე რომ მისი განვითარების ლოგიკა არ დაირღვეს, მსახიობმა უნდა შეძლოს მთლიანად შეერწყას განსახიერებულ იერსახეს. მას განსაკუთრებით უნდა ჰქონდეს განვითარებული შემოქმედებით წარმოსახვის უნარი. კინემატოგრაფში მუშაობისას მსახიობი მოკლებულია აგრეთვე მაყურებელთა დარბაზის განცდას, მაყურებელთან ცოცხალ კონტაქტს.
