კლდის იასამანი
კლდის იასამანი - Kentranthus longiflorus Steven
ქართლ. – კლდის ყვავილი
კლდის იასამანი ეკუთვნის კატაბალახასებრთა ოჯახს. ქართლის, მესხეთისა და იმერეთის ბარში, კლდის ნაშალსა და ქვიან ფერდობებზე იზრდება. განსაკუთრებით ხშირად თბილისის მისადგომებში გვხვდება, სადაც კლდის ნაშალი და ქვიანი ადგილები იშვიათი არ არის. კლდის იასამანი მრავალწლოვანი მცენარეა. ჩვეულებრივ, ერთი ფესვიდან რამდენიმე ღერო აქვს ამოტანილი. ღერო სწორმდგომია, ღრუიანი და შეუბუსავი. სიმაღლით 80 სმ-ს აღწევს, უფრო ხშირად კი – 35-60 სმ-ს.
ფოთლები ვიწროა, კიდემთლიანი, მოყვანილობით ხაზური ან ლანცეტა-ხაზური, ფუძისკენ მცირეოდენ შევიწროებული, ზემოდან მუქი მწვანე, ქვემოდან — მცირეოდენ მკრთალი. ფოთოლთგანლაგება მოპირისპირეა. ფოთლების უბეებიდან სუსტი ტოტებია განვითარებული. ყვავილობას იწყებს მაისში და ძალიან დიდხანს ყვავის, თითქმის მთელი ზაფხული.ყვავილები იასამნისფერია, შეკრებილია წყვეტილ საგველასებრ ყვავილედად. თითოეული ყვავილის გვირგვინი ძალიან ვიწროა და გრძელი, ზემოთკენ ძაბრივით გაფართოებული და ხუთნაკვთიანი, ძირში — გრძელდეზიანი. ყვავილში ერთი ბუტკოა და ერთი მტვრიანა, რომელიც გვირგვინიდან ამოყოფილია. ნაყოფი მობრტყოა, საფრენით აღჭურვილი.
