კჲარაზ
კჲარაზ - ურთიერთდახმარება. სოფლის მეურნეობის სამუშაოებისათვის ჩამოყალიბებული ურთიერთდახმარების ფორმა. იგი აფხაზების ყველა სოფელში და თემში იყო გავრცელებული. როგორც წესი სამიწათმოქმედო სამუშაოების შესრულების დროს ფუნქციონირებდა. იგი ხელს უწყობდა საერთო ძალებით გაერთიანების ყველა წევრის ნაკვეთის დროულად დამუშავებას, რიგის დაცვით. კოლექტიური შრომა არ წყდებოდა მანამ ყველა ნაკვეთს არ დაამუშავებდნენ. შრომის დროს მონაწილეები ორ პარტიად გაყოფილი სპეციალურ საგუნდო სიმღერებს ასრულებდნენ. შესვენებებზე სხვადასხვა თამაშობებითა და შეჯიბრებებით ერთობოდნენ. აფხაზეთის თავადები კიარაზის მონაწილეების დახმარებით ყოველთვის სარგებლობდნენ. მოგვიანებით, საბჭოთა წყობილების დასაწყისში კიარაზი რევოლუციური ჯგუფის სახელწოდება გახდა, რომელსაც სათავეში ნ. ლაკობა ჩაუდგა. კიარაზის წევრებიდან მთავრის პირად მცველებსაც ირჩევდნენ, თუმცა, იგი შარვაშიძეების ნათესაური ჯგუფის წარმომადგენლებისგან უფრო დგებოდა, რადგან დაცვა გარანტირებული იყო. კიარაზის წევრები ერთგული სამსახურისთვის მთავრისგან ჯილდოს იღებდნენ.
