მესხიშვილი მერი
მერი მესხიშვილი – (დ. 29 აპრილი 1923 - 19 ივლისი, 2010 თბილისი), ენათმეცნიერი-ლექსიკოლოგი. 1945 დაამთავრა თსუ ფილოლოგიური ფაკულტეტის აღმოსავლეთმცოდნეობის განყოფილება. 1951 დაიცვა საკანდიდატო დისერტაცია – „გ. სუნდუკიანი და ქართული ლექსიკა-ფრაზეოლოგია მის ნაწარმოებებში".
1950-იდან მუშაობს ენათმეცნიერების ინსტიტუტის ლექსიკოლოგიის განყოფილებაში. 1951-იდან მონაწილეობდა „ქართული ენის განმარტებითი ლექსიკონის“ (ქეგლ) 8 ტომეულის მასალების სარედაქციოდ მომზადებაში: იყო რედაქტორი VI ტომისა (თ. შარაძენიძესთან ერთად). ქეგლ-ის მომზადებაში შეტანილი წვლილისათვის 1971 მიენიჭა საქართველოს სახელმწიფო პრემია.
მესხიშვილი ასევე მონაწილეობდა სხვა ლექსიკოგრაფიულ სამუშაოებში: „ქართული ენის განმარტებითი ლექსიკონი – ინვერსიული ლექ- სიკონი“, თბ., 1967; „ქართული ენის განმარტებითი ლექსიკონი – ერთტომეული“, თბ., 1986; „ვეფხისტყაოსნის“ ფუძეთა და სიტყვაფორმათა ინდექსი“, თბ., 1973. იგი ერთ-ერთი შემდგენელია „ქართლური დიალექტის ლექსიკონისა“, თბ., 1981.
მესხიშვილის ხელმძღვანელობითა და რედაქტორობით მომზადდა ქეგლ-ის 8-ტომეულის დამატებითი ტომი.
გამოქვეყნებული აქეს ნაშრომები ქართული ლექსიკოგრაფიის საკითხებზე.
ა. არაბული
