მეწამული ბილწასოკო
მეწამული ბილწასოკო (ლათ. Amanita porphyria (Fr.) Secr. რუს. Мухомор порфировый)
ქუდი – 4-9 სმ–მდე დიამეტრისაა, ჯერ ზარისებრია, შემდეგ-გაშლილი, ზედაპირზე ახასიათებს მეჩხრად განწყობილი მსხვილი თეთრი ფიფქები, რომელიც საერთო საბურვლის ნარჩენს წარმოადგენს, კიდეები სადაა, მურა-ნაცრისფერი ან ნაცრისფერ-მურა მეწამული ელფერით, ფირფიტები თეთრია.
ფეხი – 5-10 სმ სიგრძისაა და 0,8-1,5 სმ სისქისა, ძირში ბოლქვისებრია, ჩამჯდარია ნახევრად თავისუფალ, ოდნავ დანაკვთულ თეთრ ვოლვაში. ახასიათებს საყელო, ფეხი მის ქვემოთ მურაა, ძირში შებუსვილია, მოთეთრო ან ნაცრისფერ-იისფერია. საყელო სადაა, თეთრი, მოყვითალო ან ნაცრისფერ-იისფერი.
რბილობი – თეთრია.
სპორები – ბურთისებრია, უფერული, 8-10 მკმ.
იზრდება ნიადაგზე, ფოთლოვან და შერეულ ტყეში ზაფხულ-შემოდგომით. ძლიერ შხამიანია, შეიცავს შხამიან ნივთიერებას – ბუფოტენინს, იწვევს ნერვული ცენტრების სიდამბლავეს.
