მიქელაძე ირაკლი

ირაკლი მიქელაძე

მიქელაძე ირაკლი − (Mikeladze Irakli), (დ. 1902 - გ. 1986), საქართველოს მეცნიერებათა აკადემიის აკადემიკოსი (1969), ეკონომიკურ მეცნიერებათა დოქტორი (1961), პროფესორი (1963), საქართველოს სახელმწიფო პრემიის ლაურეატი მეცნიერებისა და ტექნიკის დარგში (1972), საქართველოს მეცნიერების დამსახურებული მოღვაწე (1962).

1925 წელს დაამთავრა თსუ სოციალურ-ეკონომიკური ფაკულტეტი. იყო თსუ სახალხო მეურნეობის დაგეგმვის, შემდგომში, მრეწველობისა და სოფლის მეურნეობის ეკონომიკის კათედრის გამგე (1937-1977), ეკონომიკის ფაკულტეტის დეკანი (1954-1956), საქართველოს სსრ მინისტრთა საბჭოსთან არსებული სახელმწიფო საგეგმო კომიტეტის თავმჯდომარის მოადგილე (1956-1968), 1960 წლიდან მოადგილე მინისტრის სტატუსით.

ი. მიქელაძის კვლევის ძირითადი სფერო მოიცავდა მრეწველობის ეკონომიკას. მისი ნაშრომები ეხება ქვეყნის მეურნეობის დაგეგმვის თეორიულ და პრაქტიკულ საკითხებს, ეკონომიკის სპეციალიზაციისა და კომპლექსური განვითარების, ტემპების, პროპორციებისა და სტრუქტურის, ელექტროენერგეტიკის ფუნქციონირების, შრომის ტერიტორიული და დარგობრივი დანაწილების პრობლემებს.

ძირითადი ნაშრომებია:

„საქართველოს სახალხო მეურნეობის სპეციალიზაცია და კომპლექსური განვითარება”. მოსკოვი, 1964 (რუსულ ენაზე);
„საქართველოს მრეწველობის ეკონომიკის საკითხები”. თბ., 1977;
„ტერიტორიული დაგეგმვის პრობლემები”. თბ., 1980.

წყარო

თანამედროვე ეკონომიკის ენციკლოპედიური ლექსიკონი