მულტიცეპსი

მულტიცეპსი (Multiceps; ლათ. multus მრავალრიცხოვანი + kephale თავი) – ცესტოდების გვარი; მიეკუთვნება Taeniata-ს ქვერაზმს. სახეობები:

- Multiceps multiceps – პარაზიტობს ძაღლის, მგლის, მელიის, ტურის, ყარსაღის წვრილ ნაწლავებში. მისი ლარვული ფორმა – Coenurus cerebralis ლოკალიზებს მცოხნელი ცხოველების, ზოგჯერ ადამიანის თავის ტვინში, იშვიათად – ზურგის ტვინში;

- Multiceps skrjabini (აკად. კ. სკრიაბინის პატივსაცემად) – პარაზიტობს ძაღლისა და მგლის წვრილ ნაწლავებში. მისი ლარვული ფორმა – Coenurus skrjabini ლოკალიზებს ცხვრისა და თხის კანქვეშა უჯრედისში, კუნთებში, მუცლის ღრუში;

- Multiceps serialis (ლათ. series ჯაჭვი, მწკრივი) – პარაზიტობს ხორცისმჭამელი ცხოველების ნაწლავებში. მისი ლარვული ფორმა – Coenurus serialis ლოკალიზებს მღრღნელების (ბოცვერი, კურდღელი) კუნთებშუა შემაერთებელ ქსოვილში.

მულტიცეპსის ზრდასრული (ლენტისებრი) ფორმები ძაღლის, მგლის, მელიის, ტურის, ყარსაღის მულტიცეპტოზის აღმძვრელებია.

წყარო

სავეტერინარო პარაზიტოლოგიის ტერმინთა ლექსიკონი