მძლავრი ჯგუფი
„მძლავრი ჯგუფი“ – რუს კომპოზიტორთა შემოქმედებითი გაერთიანება, რომელიც ჩამოყალიბდა XIX ს. 50-იანი წწ. დასასრულსა და 60-იანი წწ. დასაწყისში. ცნობილია აგრეთვე ახალი რუსული მუსიკალური სკოლის ან „ბალაკირევის წრის“ სახელწოდებით. „მძლავრი ჯგუფია“ შემადგენლობაში შედიოდნენ: მ. ბალაკირევი, ა. ბოროდინი, ც. კიუი, მ. მუსორგსკი, ნ. რიმსკი-კორსაკოვი, მუსიკისმცოდნე. ვ. სტასოვი. ჯგუფის პროგრამა და იდეურ-ესთეტიკური შეხედულებები, რეალისტური შემოქმედების მეთოდი 60-იანი წლების დემოკრატიული იდეოლოგიის გავლენით ჩამოყალიბდა. სიმფონიურ ნაწარმოებებში, რომლებიც უმთავრესად პროგრამულია, დიდი ადგილი უჭირავს ხალხურ ყოფას, ზღაპარსა და ეპოსს. „მძლავრი ჯგუფის“ წევრები დიდად აფასებდნენ ხალხურ სიმღერას, რომელიც მათი ნაწარმოებების მუსიკალური ენის ძირითადი საფუძველი იყო. „მძლავრი ჯგუფის“ კომპოზიტორთა შემოქმედებამ მსოფლიო აღიარება მოიპოვა და გავლენა მოახდინა არა მარტო რუს, არამედ სხვადასხვა ეროვნული სკოლების წარმომადგენელ კომპოზიტორებზე.
