მჭედლიშვილი შალვა

შალვა მჭედლიშვილი

მჭედლიშვილი შალვა − (1923 − 2007), ქართველი მწერალი, პოეტი, ექიმი. დაიბადა სოფელ ანაგაში (სიღნაღი). 1930 წელს სასწავლებლად პირველ საცდელ-საჩვენებელ სკოლაში (დღევანდელი თბილისის კლასიკური გიმნაზია) შეიყვანეს, რომელიც 1940 წელს დაამთავრა. სკოლის დამთავრების შემდეგ მას საბუთები შეუტანია ენისა და ლიტერატურის ფაკულტეტზე, მაგრამ მშობლებს შვილის უნივერსიტეტში შეტანილი საბუთები გამოუტანიათ და სამედიცინო ინსტიტუტში შეუტანიათ. 1945 წლის 27 მარტს 22 წლის შალვა მჭედლიშვილი „იდეოლოგიურად მიუღებელი“ ლექსების გამო დააპატიმრეს და თორმეტი წელი გაატარა გადასახლებაში; იქიდან ამნისტიით დაბრუნდა, მაგრამ დედაქალაქში ცხოვრების უფლება არ ჰქონდა; გამოცემული აქვს ათზე მეტი წიგნი, არის ავტორი სამეცნიერო და პუბლიცისტური წერილების.

დამშვიდობება

მშვიდობით, ვტოვებ მშობლიურ ქალაქს,

სადაც მაწამეს და ჯვარზე მაცვეს,

სადაც ყოველდღე ვხვდებოდი ჯალათს,

სადაც ყოველდღე ვხვდებოდი გამცემს.

რა მახსოვს ან რას ვნატრობდი ნეტავ,

ან სიყმაწვილის წლები სად არის!

მამულის ყველა საპყრობილეთა

გამხადეს მკვიდრი მე ბინადარი.

კურთხეულ იყვნენ სხივნი მზისანი,

მზე – ღვთაებრივი ქალის ხატება,

ო, უბედური მხოლოდ ის არის,

ვინც არასოდეს დაიბადება.

წყარო

ქართველი პოეტები (ენციკლოპედია)