მხარგრძელი სტეფანე
NPLG Wiki Dictionaries გვერდიდან
მხარგრძელი სტეფანე – (1924-2013), პოეტი და მთარგმნელი რუსული და ინგლისური ენებიდან. თარგმნილი აქვს რუსული კლასიკური და ყოფილი სსრკ-ს ხალხთა პოეზიის არაერთი ნიმუში. პირველი ლექსი გამოაქვეყნა 1941 წელს; იღვწოდა ამიერკავკასიის ფრონტის გაზეთების რედაქციებში. ეროვნულ მოძრაობაში იყო 1980-იანი წლების ბოლოს. სხვადასხვა დროს მუშაობდა გურჯაანის რაიონული გაზეთის პასუხისმგებელ მდივნად, გაზეთ „კომუნისტის” კულტურისა და ყოფაცხოვრების განყოფილების გამგედ, გაზეთ „წიგნის სამყაროს” რედაქტორის მოადგილედ. გამოცემული აქვს ლექსების კრებულები: „უკვდავი სახელები”, „საქართველოს წყაროები” (1963), „წამო, გომბორზე გადაგახედო” (1982), „ჯაგანი”.
- * * *
- მე უფრო ადრე გარდავიცვალე,
- ახლა მივყავარ, სიკვდილს ჰგონია,
- ჩემი სიცოცხლე ჰგავდა სიზმარეთს,
- ჰგავდა კოშმარეთს და აგონიას.
- მკლავდა დროება უნდო, მზაკვარი,
- მტკნარი სიცრუით გამრუდებული,
- მე უფრო ადრე ჩამცეს ლახვარი
- და დამანატრეს მამულ-დედული.
- ჩემი ცხოვრება გაჰყვა გრიგალებს,
- წელი ყოველი სიმწრის ტოლია,
- მე უფრო ადრე გარდავიცვალე,
- ახლა მივყავარ, სიკვდილს ჰგონია.
