ნახუცრიშვილი გაგა

გაგა ნახუცრიშვილი

ნახუცრიშვილი გაგა – (1971), ქართველი პოეტი. დაიბადა მოსკოვში. 1988 წელს დაამთავრა თბილისის 530-ე სკოლა, 1993 წელს კი − თსუ-ს ისტორიის ფაკულტეტი. 1995-1997 წლებში იყო ისტორიის მასწავლებელი; 1996-2000 წლებში – ჟურნალისტი; კითხულობს ლექციებს თანამედროვე ქართული ლიტერატურის შესახებ საქართველოს ტექნიკურ უნივერსიტეტში; თანამშრომლობს ჟურნალ „ანაბეჭდთან”. გამოცემული აქვს ლექსების კრებულები: „უაზრო მგზავრი” (1996), „სიმარტოვე” (2000), „გამგზავრება და მოლოდინი” (2002), „უცაბედად” (2006), „სხვანაირი დრო” (2007), „გოგო ფა ევროპა” (2009).

გადაბრუნებული დედამიწა

არაფერს ვგმობ და არაფერს ვებრძვი,

და სიტყვით ვინღა უნდა ვაცდუნო,

სად არის ღერძი, მომეცით ღერძი,

დედამიწა რომ გადავაბრუნო.

რომ არაფერი აღარ შევცვალო

და დასალევიც უკვე დავლიე,

რომ აღარავინ არ შევიყვარო,

მხოლოდ ვუყურო ზეცას ცარიელს.

არაფერს ვამხელ, არაფერს განვსჯი,

არ მინდა რამეს ცილი დავწამო,

მე მარტო ვზივარ ჩემს მყუდრო სახლში

და გარეთ მოდის მყუდრო საღამო.

არაფერს ვცლი და არაფერს ვავსებ,

და არ ვარ ბოლო და არც პირველი,

ვინც იგონებდა სულელურ ზღაპრებს,

ვის ჯადოსნური სწამდა ფრინველი.

არაფერს ვგმობ და არაფერს ვებრძვი,

და არ მსურს ისევ თავი ვაცდუნო,

სად გაქრა ღერძი, მომეცით ღერძი,

დედამიწა რომ გადავაბრუნო.

წყარო

ქართველი პოეტები (ენციკლოპედია)