ნეოასკარიდოზი

ნეოასკარიდოზი –(neoascaridosis; აღმძვრელის გვარის დასახელება Neoascaris + ბერძნ. osis დაავადება), მსხვილფეხა მცოხნელი პირუტყვის მოზარდეულის ჰელმინთოზი.

აღმძვრელი, ნემატოდა – Neoascaris vitulorum პარაზიტობს წვრილ ნაწლავებში, ზოგჯერ – მაჭიკში. გავრცელებულია ყველგან. ავადდებიან ოთხ თვემდე ასაკის ხბოები, კამეჩისა და ზებუს მოზარდეული.

სიმპტომები: მადის დაკარგვა, რძის მიღებისთანავე ტიმპანიის განვითარება. პირის ღრუდან აცეტონის მსგავსი სუნი აღინიშნება. ფეკალი მუქიდან შავამდე შეფერილობისაა, რაც დამოკიდებულია სისხლის მინარევის ოდენობაზე. დაავადების მძიმე ფორმით მიმდინარეობისას ვითარდება ფაღარათი ან ყაბზობა, ნაწლავების შებერვა. ავადმყოფი ხშირად შარდავს. სუნთქვა გართულებულია. არის ხველა, კუნთების კრუნჩხვითი შეკუმშვები, ვითარდება უკანტანის დამბლა, ირღვევა მოძრაობის კოორდინაცია, ჩლუნგდება ცნობიერება. ცხოველი ძლიერ გამხდარია. ინტენსიური დაინვაზიების დროს შესაძლოა განვითარდეს ნაწლავების გაუვალობა.

წყარო

სავეტერინარო პარაზიტოლოგიის ტერმინთა ლექსიკონი