ქუთათელაძე ნინო

ნინო ქუთათელაძე

ქუთათელაძე ნინო − (1952), პოეტი. დაიბადა თბილისში. 1975 წელს დაამთავრა თსუ. მუშაობდა საქართველოს ტელერადიო კორპორაციის ლიტერატურის განყოფილების გამგედ. გამოცემული აქვს კრებულები: „ფოთლის ფარდა” (1980), „სამი მონოლოგი” (პოემები) (1985), „მუსიკა სცენიდან” (1989), „თეთრი ათინათი” (1991) ,„ჰოი , ლიპარიტ!” (1999).

* * *

არავის კარზე არ მიმღერია,

არც სიტყვა მითქვამს

ჩემდა სარგებად,

არაფერია, არაფერია

და არაფერიც მალე თავდება.

იქნებ არაფერს თავის ფერი აქვს,

ხან სისხლად ჟონავს,

ხანაც ხუნდება...

მაგრამ სიცოცხლე გადამელია

და არაფერი არ დაბრუნდება,

არაფერი ნთქავს ღამის ნაღვერდალს,

დღისით ცეკვავს და თანაც დაჰმღერის:

„არაფერია, არაფერია,

არაფერია ჩემი სახელი!”

ვისაც არაფრის არ ეშინია,

აბა, გაუძლოს არაფრის სივრცეს!

როცა ცხოვრებაც არაფერია

და არაფერი შიგ სულში გიმზერს.

წყარო

ქართველი პოეტები (ენციკლოპედია)