ორაგულების ოჯახი
ორაგულების ოჯახი – Salmonidae
ტიპი: ქორდიანები
კლასი: სხივფარფლიანი თევზები
რიგი: ორაგულისნაირნი
ოჯახი: ორაგულისებრნი
თევზების ოჯახი ორაგულისნაირთა რიგისა. ორაგულები მეტად სარეწაო მნიშვნელობის ოჯახს წარმოადგენენ. ცხიმოვანი ფარფლი აქვთ. სხეული მკვრივი ქერცლითაა დაფარული. გვერდითი ხაზის ორგანო გააჩნიათ, თავი შიშველია. ლაყუჩის ჩხირები 8-20-ია. მუცლის ფარფლში 1 (6) 7-12 სხივია. ზედა ყბების კიდე ყბებშორისი და ზედა ყბების ძვლების მიერაა წარმოქმნილი. ზედა ძვალზე დამატებით ერთი ძვალი მოიპოვება. ზედა ყბის ძვლები შუბლის ძვლებს ეხება, მაგრამ ხშირად თხემის ძვლებითაა დაფარული. თხემის ძვლები ან არ უერთდება ზედა კეფის ძვალს (მაგ. Salmo-ს) ან უერთდება (მაგ. Goregous-ს) და ამნაირად ზედა კეფის ძვლებიდან შუბლის ძვლებს გამოყოფენ. Opistoticum და ორბიტოსპენოიდი აქვთ. ბაზისპენოიდი ან აქვთ ან არა. უკანა ლავიწის ძვლები ლავიწის შიგნითა მხარეზეა მიმაგრებული. მეზოკორაკოიდი აქვთ. ხრტილოვანი ქალა კარგადაა განვითარებული. თხემის განყოფილებაში ნახვრეტი ან სრულებით არ გააჩნიათ, ან ერთ წყვილზე მეტი არაა. კუდის ფარფლის ფუძესთან მალები ზემოთაა აკეცილი, საცურავი ბუშტი დიდია. კვერცხსავლები ჩანასახოვანია, ან სრულებით არა აქვთ. კუჭი მოხრილი მილის სახისაა და ბრმა ტოპრაკს მოკლებულია; იგი აღჭურვილია მრავალრიცხოვანი (17-210) პილორული დანამატებით. ლაყუჩი ოთხია, პსევდობრანქია გააჩნიათ. ლაყუჩთა აპკები ლაყუჩთაშორის ძგიდეებთან შეზრდილი არ არის. ზურგის ფარფლი მოკლეა და მასში არა უმეტეს 16 სხივია. (დატოტვილისა და ჩანასახოვანი სხივების ჩათვლით). ქვირითს მტკნარ წყლებში ყრიან; ქვირითი დიდი ზომისაა. გამსვლელი და მტკნარი წყლების თევზებია. გავრცელებულია ევროპის, ჩრდილო-დასავლეთ აფრიკის, ჩრდილოეთ აზიასა და ჩრდილოეთ ამერიკაში. შეიცავს ცხრა გვარს. საქართველოში გვხვდება ორი გვარი.
