ორმოცაძე ნათია

ნათია ორმოცაძე

ორმოცაძე ნათია − (1971), განათლებით − ფილოლოგი. 15 წელია აქტიურად მუშაობს ტექსტების რედაქტირებასა და თარგმანზე. თარგმნის რუსულ მხატვრულ და საღვთისმეტყველო ლიტერატურას. არის ავტორი რამდენიმე ნათარგმნი წიგნისა.

ალექსანდრ ბლოკი

თარგმნა ნათია ორმოცაძემ

როცა ამქვეყნად დაგივიწყებენ,

როცა დარდები შემოგაწვება,

და ყველაფერი რაც კი გხიბლავდა,

საფლავის ქვის ქვეშ ნელა გაქრება;

როცა ქალაქის მოკირწყლულ გზებზე,

თითქოს დაგადეს ფეხზე ხუნდები,

ღონემიხდილი, უტყვი, სნეული,

შებინდებისას სახლში ბრუნდები,

გზად შეისვენე სულ ერთი წამით

და მოუსმინე სიჩუმეს ღამის:

სმენით შეიცნობ სულ სხვა ცხოვრებას,

რომელიც დღისით ვერ შეიცანი;

სულ ახლებურად შეხედავ ირგვლივ

თოვლიან ქუჩებს, კვამლს რუხს და მწარეს,

თეთრ, მიტოვებულ, მოუვლელ ბაღნარს,

დღის მომლოდინე მწუხარე ღამეს;

იისფერ ზეცას − ამ ბრძენ წიგნთაწიგნს;

სულში იპოვი შენ უფრო მეტსაც:

მოხუცი დედის დაღარულ სახეს;

ამ უბადლო წამს ისევ გაკრთება -

ეს დამქანცველი ყინვა-სიცივე,

და მინა ჭირხლით უცხოდ ნაქარგი,

მადლიერ გულში ისევ აღდგება

ტრფობა, დიდი ხნის წინ დანაკარგი.

წყარო

ქართველი პოეტები (ენციკლოპედია)