პლანო კარპინი

პლანო კარპინი – (итал. Giovanni da Pian del Carpine; ჯოვანი და პიან დელ კარპინე, 1182–1252 წწ.), იტალიელი მოგზაური.

პლანო კარპინი რომის პაპმა ინოკენტი IV-მ გაგზავნა მონღოლეთის ყაენთან ბათოსთან, იქიდან ის უნდა წასულიყო დიდი ყაენის დედაქალაქ ყარაყორუმში. პლანო კარპინი ბრესლავლისა და კრაკოვის გავლით თავის თანამგზავრ ფრანცისკიანელ ბერთან ლავრენტისთან ერთად (პორტუგალიელი) ჩავიდა კიევში, იქიდან ექვსი დღის შემდეგ მიაღწია თათართა სამეფოს. აქედან რამდენიმე დღის შემდეგ ცხენით ჩავიდა ბათოს სატახტო ქალაქში. ბათომ გასცა განკარგულება, რათა პლანო კარპინი მიეცილებინათ დიდ ყაენთან შემდეგი მარშრუტით: ხვარაზმი–სემირეჩიე–ტარბაგატაი–მონღოლეთი. სამ თვე ნახევარს გრძელდებოდა ეს მოგზაურობა, რომლის დროს მათ დიდი გაჭირვება გადაიტანეს, რათა უფრო სწრაფად ჩასულიყვნენ და მიესწროთ ახალი ყაენის გუიუკას (კაიუკას), ყაენ უბგედეს შვილის, გამეფებისათვის. ყოველდღე ხუთჯერ იცვლიდნენ ცხენებს, 1246 წ. ივლისში პლანო კარპინი და ბერი ლავრენტი ჩავიდნენ ყაენის დროებით სატახტო ქალაქში, რომელიც დაშორებული იყო ყარაყორუმიდან ნახევარი დღის სავალზე. თავის წიგნში „Libellus Historicus“ (დღიური). პლანო კარპინი აღწერს გზას და იძლევა დიდი ყაენის სხვადასხვა ქვეშევრდომის ზნე-ჩვეულებებს. განსაკუთრებით დაწვრილებით საუბრობს მონღოლების შესახებ. XIII საუკუნის იტალიელი მემატიანე – სალიმბენე, რომელსაც პლანო კარპინი 1247 წ. უნახავს, ახასიათებს მას შემდეგნაირად: „ეს იყო ადამიანი ღირსეული, გონებამახვილი, განათლებული, მჭევრმეტყველი და დიდი ნიჭის პატრონი; მან დასწერა დიდი წიგნი იმის შესახებ რაც იხილა.

წყარო

გამოჩენილი გეოგრაფები და მოგზაურები