რატიანი ზვიად

ზვიად რატიანი

რატიანი ზვიად − (1971), პოეტი. დაიბადა თბილისში. დაამთავრა თბილისის 190-ე საშუალო სკოლა და საქართველოს ტექნიკური უნივერსიტეტის (სტუ) კავშირგაბმულობის ფაკულტეტი. წლების მანძილზე მუშაობდა ლიტერატურულ ორგანიზაციებში, შემდეგ – მობილური ოპერატორის „ჯეოსელის“ სისტემაში. თარგმნის ინგლისურ და გერმანულენოვან პოეზიას (ელიოტი, პაუნდი, ფროსტი, სენდბერგი, ოდენი, ლოუელი, სტრენდი, უოლკოტი, სიმიკი, ჰინი, რილკე, ცელანი და სხვ.). გამოცემული აქვს კრებულები: „გამომიგონე” (1993), „ჩურჩულის გაკვეთილი” (1994), „ჯიბის ჰაერი” (2000), „გზები და დღეები” (2005), „ნეგატივი” (2009), „შენთვის შეიძლება” (2015).

* * *

როგორც ზღვისპირა ქალაქების

ბინადრებისთვის − ზღვა,

რომელიც ყოველთვის და ისედაც არის,

იმადვე იქცა პოეზია ორმოცის შემდეგ:

ჩანს თუ არა, ის მუდმივად სადღაც ახლოა,

იგულისხმება სახლების და ხეების მიღმა,

ღელავს, მშვიდდება, ცივდება, თბება,

და მას შემდეგ, რაც ცხოვრება

საპირისპირო მხარეს დაცერდა,

ორმოცის შემდეგ, დახრილი ფერდით

სულ უფრო ღრმად ეფლობა მასში.

და სულ უფრო იშვიათად გიზიდავენ

თვითონ ლექსები –

როგორც ზღვისპირა ქალაქების ბინადრები,

რაც წლები გადის, რაც ასაკი ემატებათ,

უფრო და უფრო იშვიათად შედიან ზღვაში.

წყარო

ქართველი პოეტები (ენციკლოპედია)