რახუ
NPLG Wiki Dictionaries გვერდიდან
რახუ – (ინდ.) ურჩხულსახიანი ერთ-ერთი ასური. როცა ღმერთებმა ამრიტა – უკვდავების სასმელი მოიპოვეს და რიგრიგობით სვამდნენ მას, რახუმ ღმერთის სახე მიიღო და შეიპარა მათ შორის და, ის იყო, დაეწაფა ამრიტას, რომ მზემ და მთვარემ გამოიცნეს იგი და ამხილეს, არ დაანებეს ბოლომდე შეესვა თასი. განრისხებულმა ვიშნუმ თავი მოჰკვეთა მას. მაგრამ უკვდავების სასმელმა მოასწრო ყელამდე ჩასულიყო, ამიტომაც მისი თავი უკვდავი გახდა. თავმა ცას მიაშურა, თავად კი მიწაზე დაეცა და მის დაცემაზე შეიძრა მიწა. მას შემდეგ რახუს უკვდავი თავი ცაზე იმყოფება და სულ მუდამ ცდილობს სამაგიერო გადაუხადოს მზესა და მთვარეს, დევნის მათ შთასანთქმელად და შთანთქავს კიდეც. ამიტომაც ხდება მზისა და მთვარის დაბნელებები. ზოგჯერ რახუ კუდიან ვარსკვლავად გადასერავს ხოლმე ცას.
