რინორეა

რინორეა - ცხვირიდან გამონადენი.

ცალმხრივი ჩირქოვანი რინორეა

ამ მოვლენის დროს, აუცილებლად უნდა გამოვრიცხოთ ცხვირის ღრუს უცხო სხეული, ცხვირის პოლიპოზი ან სხვა ტიპის სიმსივნე და შესაძლოა, ოდონტოგენური სინუსიტიც (კბილიდან წამოსული ჰაიმორიტი).

უცხო სხეულის და ოდონტოგენური ჰაიმორიტის უტყუარი ნიშანია სუნიანი რინორეა. იგი მკვეთრად სუნიანი გამონადენით ხასიათდება.

ორმხრივი ჩირქოვანი რინორეა

უმეტესწილად, უბრალო რინიტის ან ორმხრივი სინუსიტის ნიშანია. გამონადენის სიჭარბე არანაირად არ არის კავშირში ანთებითი პროცესის სიმძიმესთან.

სისხლიანი რინორეა

იგივე ეპისტაქსისი, ცხვირიდან ხახაში ან ნესტოებიდან სისხლის დენას ნიშნავს. როდესაც პაციენტი წევს, მას შესაძლოა ეს სისხლი უკან, ხახაში გადაუვიდეს და ამან არასწორი დიაგნოზისკენ გვიბიძგოს, როგორიცაა ჰემატომეზისი ან ჰემოპტიზია.

NOTA BENE ეპისტაქსისის დროს ჩაყლაპული სისხლი, სავარაუდოდ, სისხლდენის მიზეზის დადგენაში ხელს შეგვიშლის; ამავე დროს, შესაძლოა გამოგვეპაროს სისხლის დიდი რაოდენობის დაკარგვაც. თუმცა, ჩაყლაპული სისხლის მონელება ვერ ხერხდება და ამიტომ, პაციენტი მას აუცილებლად აღებინებს და აი აქ, უკვე შესაძლო ხდება რეალურად დაკარგული სისხლის რაოდენობის შეფასება;.

თავ-ზურგ-ტვინის (ცერებრო-სპინალური) სითხის რინორეა, ლიქვორეა

ეს მოვლენა ქალას ფუძის ტრავმების დროს გვხვდება. თუმცა, შესაძლოა სხვა ეტიოლოგიაც ჰქონდეს. მაგალითად, ძვლოვანი ქსოვილის (Lamina cribrosa-ს) განლევა.

ასეთი სპონტანური ლიქვორეა, როგორც წესი, ჭარბია და ქალასშიდა ჰიპერტენზიის გამო ვითარდება. არ არის გამორიცხული, სიმსივნოვანი პათოლოგიური პროცესის გამო, ლიქვორეას სპონტანური დაწყებაც.

ლიქვორეას გამომწვევი მიზეზი არ არის მხოლოდ დაცხრილული ფირფიტის მიდამოს ნაპრალი. შესაძლოა ქალას პეტროზული (კლდოვანი) ნაწილის ნაპრალის ლიქვორეა, როდესაც ლიქვორი, ევსტაქის მილით, ცხვირ-ხახაში ჩაედინება.

ამ შემთხვევაში, კლინიკურად მისი გამოვლინება შეუძლებელია.

ზუსტი დიაგნოსტირება ხდება სითხის ქიმიური ანალიზის შედეგად. თუ სითხეში Betatransferin-ი აღმოჩნდა, ეს უეჭველად არის ლიქვორეას ნიშანი.

გლუკოზის ტესტიც იძლევა გარკვეულ მითითებებს, თუმცაშესაძლოა, სისხლიანი სითხის დროს, იგი მცდარი იყოს. ამიტომ ეს უკანასკნელი მაინც იშვიათად გამოიყენება.

ნაპრალის ადგილმდებარეობის გასარკვევად, ვიყენებთ კონტრასტულ (რად.იოდი) CT-ს, რომელიც გვიჩვენებს გამოჟონვის ადგილს. ასევე, გამოიყენება სპეციალური ფერადი ნივთიერება, რომელიც ოპერაციის დროს, ოპერაციამდე რამდენიმე საათით ადრე შეყვანილ ფერად სითხეს ენდოსკოპიურად ხილვადს ხდის.

ალერგიული და ვაზომოტორული გამჭვირვალე რინორეა

ალერგიული და ვაზომოტორული გამჭვირვალე რინორეა უფრო ხშირად ცემინებას სდევს თან და არანაირად არ არის დაკავშირებული ცერებროსპინალურ ლიქვორეასთან.

თუ ეჭვი მაინც გვაქვს, საჭიროა გამონადენის ქიმიური ანალიზი.

წყარო

ოტო-რინო-ლარინგოლოგია და თავ-კისრის პათოლოგიები