საკმეველი
საკმეველი - სურნელოვანი ფისი, რომელიც გამოიყოფა მცენარის - „ბოსველიას“ ანუ საკმევლის ხის დასერილი ქერქიდან. საკმეველი შეიცავს გუმფისს, ეთეროვან ზეთებს, მწვანე ნივთიერებებს. ნაწილობრივ იხსნება წყალსა და ორგანულ გამხსნელებში. საკმევლის ანუ გუნდრუკის კვამლის ზეცაში ასვლა სიმბოლურად გამოხატავს ლოცვა-ვედრების ასვლას ზეცაში და იქიდან მადლის გადმოსვლას.
საკმეველის კმევას ეგვიპტურ საკულტო მსახურებაში უდიდესი როლი ენიჭებოდა, რადგან ითვლებოდა, რომ მას ბოროტი სულების განდევნა შეეძლო. ლიბაციასთან ერთად, ის განწმენდის რიტუალის უმნიშვნელოვანეს ელემენტს წარმოადგენდა. საკმეველის ძალით ბოროტი სულების განდევნა ტაძრებიდან და ქალაქებიდანაც ხდებოდა. საკმეველის სურნელი ღმერთების სურნელად იყო მიჩნეული. ითვლება, რომ ეგვ. „sntr“ – „საკმეველი“ „ღმერთების სურნელიდან“ წარმოიშვა.
