სანთელაძე ედუარდ
ედუარდ სანთელაძე — (დაიბადა 1938 წლის 8 იანვარს, ქ.თბილისი — გარდაიცვალა 2004 წლის 6 მაისს, ქ.თბილისი), საქართველოს დამსახურებული მწვრთნელი, საერთაშორისო კატეგორიის არბიტრი ფრენბურთში.
ედუარდ სანთელაძემ სამსაჯო მოღვაწეობა დაიწყო 1954 წელს, რესპუბლიკური კატეგორიის მსაჯის წოდება კი 1958 წელს მიენიჭა. 1961 წელს დაამთავრა საქართველოს ფიზიკური კულტურის სახელმწიფო ინსტიტუტი და დაიწყო მუშაობა სპორტსაზოგადოება „დინამო“-ში უფროს მწვრთნელად; 1965 წელს მიენიჭა საკავშირო კატეგორიის მსაჯის წოდება, 1968 წელს კი საერთაშორისო კატეგორიის არბიტრის წოდება. იყო ყველაზე ახალგაზრდა საერთაშორისო კატეგორიის არბიტრი მთელ ყოფილ საბჭოთა კავშირში. 1973 წელს მიენიჭა საქართველოს დამსახურებული მწვრთნელის წოდება ფრენბურთში; 1968 წელს დაინიშნა საქართველოს სახელმწიფო ფიზიკური კულტურის და სპორტის კომიტეტის სპორტული თამაშების სახელმწიფო მწვრთნელის თანამდებობაზე; 1977 წლიდან მუშაობდა საქართველოს განათლების სამინისტროს სპორტული თამაშების განყოფილების უფროსად; 1987 წლიდან დაბრუნდა საქართველოს სპორტკომიტეტში სპორტული თამაშების მთავარ მწვრთნელად.
1991 წელს საქართველოს ეროვნული ფრენბურთის ფედერაციის ჩამოყალიბებისთანავე ედუარდ სანთელაძე აირჩიეს ფედერაციის გენერალურ დირექტორად, სადაც 2002 წლამდე მუშაობდა; 1995 წელს მიენიჭა საქართველოს საპატიო მსაჯის წოდება ფრენბურთში (საქართველოს რესპუბლიკის სპორტის სახელმწიფო დეპარტამენტის კოლეგიის დადგენილებით (N4-42.27.10.1995წ.) 1997 წელს მიენიჭა საქართველოს სპორტის დამსახურებული მუშაკის წოდება.
1998 წელს იაპონიაში ფრენბურთის მსოფლიო ჩემპიონატის დროს ჩატარებულ FIVB-ის (ფრენბურთის საერთაშორისო ფედერაციის) კონგრესზე მოუწყვეს გაცილება და დააჯილდოვეს ფრენბურთის 100 წლისთავის საიუბილეო ოქროს მედლით. 2001 წელს იგი გახდა ღირსების ორდენის კავალერი; მოღვაწეობის პერიოდში აღზრდილი ჰყავს რესპუბლიკური კატეგორიის მრავალი მსაჯი და საერთაშორისო კატეგორიის ხუთი მსაჯი. არაერთხელ შესულა წლის უძლიერეს მსაჯთა სიაში. სისტემატურად იღებდა მონაწილეობას საკავშირო და საერთაშორისო შეჯიბრებებში: საბჭოთა კავშირის ჩემპიონატებში (1963-1991); ევროპის თასებში (1967-1998), ევროპის ჩემპიონატებში (1971-98), მსოფლიო ჩემპიონატებში (1977-98), ოლიმპიურ თამაშებში (1980) და სხვა.
