სატანკო ჯარები
სატანკო ჯარები – ზოგიერთი ქვეყნის შეიარაღებული ძალების გვარეობა, რომლის დანიშნულებაა საბრძოლო მოქმედების წარმოება დამოუკიდებლად, ასევე ჯარების სხვა გვარეობებთან და სპეციალურ ჯარებთან ურთიერთქმედებით.
სატანკო ჯარების შეიარაღებას წარმოადგენს სხვადასხვა ტიპის ტანკები. მრავალი ქვეყნის (აშშ, დიდი ბრიტანეთი და სხვა) ჯარების ანალოგიურ გვარეობას ეწოდება ჯავშანსატანკო ჯარები. ორგანიზაციულად სატანკო ჯარები შედგება სატანკო (ჯავშანსატანკო) შენაერთების, ნაწილების და ქვედანაყოფებისგან; მათ შემადგენლობაში სატანკოს (ჯავშანსატანკოს) გარდა შედის ქვეითი (მექანიზებული და სხვა), სარაკეტო, საარტილერიო, საზენიტო არტილერიის, საზენიტო-სარაკეტო, სპეციალური ჯარების და ლოგისტიკის ნაწილები და ქვედანაყოფები. სატანკო ნაწილები შედიან ასევე ქვეითი ჯარების და საზღვაო ფეხოსნების შემადგენლობაში.
სატანკო ჯარები წარმოადგენენ სახმელეთო ჯარების ძირითად დამრტყმელ ძალას. გამოიყენება უმთავრესად ძირითად მიმართულებებზე მოწინააღმდეგისთვის მძლავრი და ღრმა დარტყმების მისაყენებლად. აქვთ რა დიდი საცეცხლე სიმძლავრე, საიმედო დაცვა, მაღალი მოძრავუნარიანობა და მანევრის უნარი, შეუძლიათ შედარებით სრულად გამოიყენონ ბირთვული და საცეცხლე დარტყმების შედეგები, მოკლე დროში მიაღწიონ ბრძოლის და ოპერაციის საბოლოო მიზნებს. სატანკო შენაერთების და ნაწილების საბრძოლო შესაძლებლობები მათ აძლევს საშუალებას აწარმოონ აქტიური შეტევითი მოქმედებები დღისით და ღამით, სხვა ჯარებისგან მოწყვეტით, გაანადგურონ მოწინააღმდეგის დაჯგუფებები შემხვედრ ბრძოლებში და ბატალიებში, შეუჩერებლად გადალახონ რადიოაქტიური დასნებოვნების ზონები და წყლის დაბრკოლებები. მათ, ასევე შეუძლიათ სწრაფად შექმნან მყარი თავდაცვა და წარმატებით აღუდგნენ წინ მოწინააღმდეგის ჭარბი ძალების შემოტევას.
