სიხარულიძე ნინო

ნინო სიხარულიძე

სიხარულიძე ნინო − (1962), პოეტი. დაიბადა თბილისში. 1979 წელს დაამთავრა თბილისის 161-ე საშუალო სკოლა, 1984 წელს კი − თსუ-ს ფილოლოგიის ფაკულტეტი. 1985 წლიდან მუშაობდა: ჟურნალ „ცისკარში” სტილისტად, შემდეგ – საქტელეფილმში სასცენარო განყოფილების რედაქტორად, თანამშრომლობდა გაზეთებთან − „მესამე ნაპირი”, „საერთო გაზეთი” და ჟურნალ „ომეგასთან”. 1986-89 წლებში მონაწილეობდა სლავისტიკის სემინარებში ბულგარეთის დედაქალაქ სოფიაში, ბულგარული ენის შესწავლის მიზნით. გამოცემული აქვს სამი კრებული: „მარადიული კარნავალი” (1986), „შორს” (1991~ და „ირიბი ბლუზი” (2007).

ბანალური ლექსი

მინდა, მყავდეს დედა; მინდა მყავდეს შვილი

და არ მკბენდეს ქარი − ავად აღრენილი,

თვალში კრთოდეს სხივი, ბაგეს აჩნდეს ღიმი,

არ სკდებოდეს გული − დაჭიმული სიმი.

მინდა, იყოს მხარი, ძლიერი და სანდო,

ჩემი დარდის გუდა რომ თამამად ვანდო.

მინდა, ითქვას სიტყვა − სიყვარულის მხსნელი

და ამ სიტყვის პოვნა სულ არ იყოს ძნელი.

მინდა, გზა გზას ჰგავდეს და არ იყოს მრუდე,

სახლი − სახლს და არა ასპიტების ბუდეს.

მინდა, ქართულ კვირტებს არ დაატყდეს მეხი

და იმედის ფესვებს არ დაადგან ფეხი.

მინდა, მყავდეს შვილი; მინდა, მყავდეს დედა,

ამ ბანალურ ლექსში მე ოცნებას ვბედავ.

წყარო

ქართველი პოეტები (ენციკლოპედია)