სუყაშვილი ზაზა

ზაზა სუყაშვილი

სუყაშვილი ზაზა – (1992), პოეტი. დაიბადა კახის რაიონის სოფელ ალიბეგლოში (აზერბაიჯანი, ჰერეთი). 2009 წელს დაამთავრა ამავე სოფლის საშუალო სკოლა. 2009-2013 წლებში სწავლობდა გრიგოლ რობაქიძის სახელობის უნივერსიტეტის ბიზნესის და მართვის ფაკულტეტზე. 2007 წლიდან დღემდე მისი ლექსები იბეჭდება პერიოდულ გამოცემებში და საერთო კრებულებში: „მესამე თვალი“, „ლექსების გამოფენა-2012“, „ხარს ვგევარ ნაიალაღარს...“, „ალავერდობა“, „თავფურცელი“, „ინსპირაცია“, „შეყვარებულთა წიგნი“; გამოცემული აქვს კრებული „მისამართი“ (2017).

ალაზნის მიღმა საქართველოში

რამდენჯერ ცრემლით დაუწყია თვალის გახელა,

თუმცა ძარღვებში დარდმა გენი ჯერ ვერ ჩახუთა!

ძნელია, როცა საინგილო ჰქვია სახელად

და ვერ იბრუნებს ისტორიულ ჰერეთს – საკუთარს…

დროის დინებამ ამოხია მატიანედან,

განგებამ დააკაბადონა, როგორც წიგნაკი.

-იცით? - იწყება საქართველო სწორედ აქედან,

ჰოდა ვალია, გავუფრთხილდეთ! ამის მიღმა კი

წყალს წაუღია უდაბნო და მთები – ხრიოკი!

მინდა სოფელში ბერიკაცი დიჲლიგს ბარავდეს,

მერე ბოსტნიდან (საღამო ხანს) პაპა იობის

მეზობლის ბავშვი საზამთროს და კიტრებს პარავდეს.

ღამით კი ლოცვით მიდიოდეს ბებო ხატებთან

და უფალს მშვიდად გათენებას ეხვეწებოდეს…

და ცხელი ცრემლი, ნაოჭიან, ფერმკრთალ ღაწვებთან

დაგუბებული, ჟონავდეს და მეწვეთებოდეს!

სანატრელია! მენატრება სოფლის მთა-ველი,

შორიდან მესმის მშობლიური კუთხის ნანინა.

ქვეყნად გამჩენო, დაკარგული ყველა მტკაველი

ნეტავი, პეშვით სამშობლოში მომატანინა!

ჭრილობებს სულზე ჩუმი ლოცვით გაიმთელებენ,

დაუბრუნდება ბაირაღი ჰერელ მედროშეს...

იქართველებენ!.. ძველებურად იქართველებენ

ალაზნის მიღმა… გასხვისებულ საქართველოში!

წყარო

ქართველი პოეტები (ენციკლოპედია)