ტარტაროსი
ტარტაროსი – (ბერძნ.) პირქუში სივრცე, რომელიც მიწის სიღრმეში მდებარეობდა, ჰადესის ქვეშ.
ტარტაროსი იმავე მანძილით არის დაშორებული დედამიწას, რა მანძილითაც თავად დედამიწაა დაშორებული ციდან. იგი წყვდიადის სამმაგი ფენითა და რკინის გალავნით არის გარშემორტყმული. მისი სპილენძის კარიბჭე პოსეიდონის ნახელავია. ტარტაროსის გარშემო მუდამ ბობოქრობს ქარიშხალი.
ტარტაროსშია ნიქსის (ღამის) სავანე. იქვე არიან დამწყვდეულნი კრონოსი და დამარცხებული ტიტანები, რომელთაც ჰეკატონქეიროსები დარაჯობენ.
ტარტაროსია ის ადგილი, სადაც უსასტიკესად ისჯებიან ცოდვილები. მათ დევნიან ერინიები, რომლებიც სინდისის მარადიულ და დამთრგუნველ ქენჯნას განასახიერებენ. შხამიანი გველებითა და ჩირაღდნებით ხელში დაქრიან ისინი მთელ ტარტაროსში და ცოდვილებს უთვალთვალებენ, რათა ბოლომდე დაითმინონ თავისი სასჯელი. ამ საქმეში მათ ეხმარებიან კერები, ადამიანთა სისხლს მოწყურებული ჯოჯოხეთის ნაშიერები.
ჰესიოდესთან ტარტაროსი გაპიროვნებულია და პირველშობილ ღმერთთა შორის მოიხსენიება (თეოგონია). მისგან შვა გეამ (დედამიწამ) ურჩხულები – ტიფონი და ექიდნა.
