ტაშკენტის კონვენცია 1966
ტაშკენტის კონვენცია 1966 – მიმდინარეობდა 4-10 იანვარს. მისი ჩატარების მიზანი იყო ქაშმირის რაიონში 1965 ინდოეთსა და პაკისტანს შორის მომხდარი სამხედრო კონფლიქტის მოგვარება. კონფერენციის ჩატარების ინიციატორად სსრკ-ის მთავრობა გამოვიდა. შეხვედრაში მონაწილეობდნენ ინდოეთის პრემიერ-მინისტრი ლ. ბ. შასტრი და პაკისტანის პრეზიდენტი მ. აიუბ-სანი, აგრეთვე სსრკ-ის მინისტრთა საბჭოს თავმჯდომარე ა. ს. კოსიგინი.
10 იანვარს მხარეებმა ხელი მოაწერეს დეკლარაციას, რომელშიც გამოხატული იყო ინდოეთისა და პაკისტანის სურვილი, ძალისხმევა არ დაეშურებინათ კეთილმეზობლური ურთიერთობების დასამყარებლად. დეკლარაცია შეიცავდა მხარეთა ვალდებულებას, ყველა სადავო საკითხი მოეგვარებინათ მშვიდობიანი ხერხებით, ძალის გამოყენების გარეშე. ინდოეთი და პაკისტანი შეთანხმდნენ, რომ არ ჩაერეოდნენ ერთმანეთის საშინაო საქმეებში და სამხედრო ძალებს დააბრუნებდნენ იმ პოზიციებზე, რომლებიც მათ ეკავათ 1965 წლის 5 აგვისტომდე. ამასთანავე, უნდა აღედგინათ დიპლომატიური წარმომადგენლობების ნორმალური მოღვაწეობა, ეკონომიკური და სავაჭრო კავშირები, უნდა გაეგრძელებინათ მოლაპარაკებები სადავო საკითხების ირგვლივ.
