ურთიერთმოქმედება
ურთიერთმოქმედება – შეიარაღებული ძალების სახეობების, ჯარების (ძალების) გვარეობების ქვედანაყოფების, ნაწილების, შენაერთების, გაერთიანებების საბრძოლო წყობის ელემენტებისა და სხვადასხვა სახეობის იარაღის შეთანხმებული, ერთობლივი მოქმედებები. ყოველივე ეს ხორციელდება ობიექტების მიმართულებების, ზღუდეების (რაიონების), დროისა და ხერხების მიხედვით ბრძოლის (ოპერაციის) მიზნების მისაღწევად.
საომარი მოქმედებების მასშტაბის მიხედვით განასხვავებენ სტრატეგიულ, ოპერატიულ და ტაქტიკურ ურთიერთმოქმედებას.
სარჩევი |
სტრატეგიული ურთიერთმოქმედება
სტრატეგიული ურთიერთმოქმედება არის შეიარაღებული ძალების იმ დიდი დაჯგუფებების შეთანხმებული მოქმედებები, რომლებიც ოპერაციებს ახორციელებენ ერთ ან რამდენიმე საომარი მოქმედების თეატრზე (სტრატეგიულ მიმართულებაზე) სტრატეგიული ოპერაციის ან მთლიანად ომის მიზნის მისაღწევად.
კოალიციურ ომებში სტრატეგიული ურთიერთმოქმედება შეიძლება ხორციელდებოდეს აგრეთვე მოკავშირე სახელმწიფოების შეიარაღებულ ძალებსა და მათ ცალკეულ დაჯგუფებებს შორის. ისინი მონაწილეობენ ერთობლივ ოპერაციაში კონტინენტურ და საოკეანო საომარი მოქმედების თეატრზე.
ოპერატიული ურთიერთმოქმედება
ოპერატიული ურთიერთმოქმედება არის შეიარაღებული ძალების სხვადასხვა სახეობის და ჯარების (ძალების) გვარეობების ოპერატიული (ოპერატიულ-ტაქტიკური) გაერთიანებების და შენაერთების შეთანხმებული მოქმედება ერთ ან რამდენიმე მომიჯნავე საოპერაციო მიმართულებაზე მიმდინარე ოპერაციის (საბრძოლო მოქმედების) მიზნის მისაღწევად.
ტაქტიკური ურთიერთმოქმედება
ტაქტიკური ურთიერთმოქმედება წარმოადგენს შენაერთების, ნაწილების, ქვედანაყოფების შეთანხმებულ, ერთობლივ მოქმედებებს ერთმანეთთან, მეზობლებთან, აგრეთვე იმ ძალებთან (საშუალებებთან), რომლებსაც ზემდგომი უფროსი იყენებს, საერთო-საჯარისო, საზღვაო და საჰაერო ბრძოლაში მიზნის მისაღწევად.
ურთიერთმოქმედების ორგანიზაციის საფუძველია ოპერაციის (ბრძოლის) წარმოებაზე გადაწყვეტილება და ზემდგომი სარდლობის მითითებები ურთიერთმოქმედების თაობაზე. ურთიერთმოქმედების ორგანიზაცია შეიძლება მოეწყოს რუკებზე, მაკეტებზე და უშუალოდ ადგილმდებარეობაზე. სახმელეთო ჯარების ტაქტიკურ რგოლში ურთიერთმოქმედების ყველა საკითხს, როგორც წესი, ხვეწენ ადგილზე, ოპერატიულში – ადგილმდებარეობის მაკეტებზე ან რუკებზე მათემატიკური მოდელების გამოყენებით, რომლებიც იმიტაციურად წარმოსახავენ ჯარების მოქმედებას დროსა და სივრცეში, ხოლო საკმარისი დროის არსებობისას – აგრეთვე ადგილმდებარეობაზე, ჩვეულებრივ, მთავარი დარტყმის (ძირითადი ძალისხმევის თავმოყრის) მიმართულებებზე (რაიონებში).
ურთიერთმოქმედებას ორგანიზაციას უწევს მეთაური (სარდალი) დაქვემდებარებული, მიკუთვნებული და მხარდამჭერი ნაწილების (შენაერთების) მეთაურებთან ერთად. ასევე შტაბის ძირითადი თანამდებობის პირების, ჯარების გვარეობების, სპეციალური ჯარების (სამსახურების) უფროსების, აგრეთვე მეზობლებისა და ურთიერთმოქმედების ჯარების და შეიარაღებული ძალების სხვა სახეობის წარმომადგენლების მონაწილეობით.
ურთიერთმოქმედების წესი ნაწილებსა და შენაერთებში ფორმდება დოკუმენტურად ურთიერთმოქმედების გეგმის ცხრილის სახით, ხოლო გაერთიანებებში – ურთიერთმოქმედების გეგმის მეშვეობით, რომლებიც წარმოადგენენ ძირითად სამუშაო დოკუმენტებს ურთიერთმოქმედების ორგანიზაციის დროს. ისინი გამოიყენება ბრძოლის (ოპერაციის) დროს ჯარების პრაქტიკული მართვისა და ურთიერთმოქმედების ხელშეწყობის შენარჩუნებისათვის.
