ფანჩვიძე ლევან

ლევან ფანჩვიძე

ფანჩვიძე ლევან – (1964), ქართველი პოეტი. წარმოშობით არის ჭიათურიდან. დაამთავრა თელავის პედაგოგიური ინსტიტუტი. მუშაობდა ლიტერატორთა რესპუბლიკურ ცენტრში, შემდეგ გაზეთ „ასავალ-დასავალში“, გაზეთ „შანსის“ (1997-98 წწ) და გაზეთ „ალიონის“ (2004 წლამდე) რედაქტორად. პირველი ლექსები გამოაქვეყნა 1988 წელს ჟურნალ „ცისკრის“ დამატება „ნობათში“. არის ავტორი კრებულებისა: „ფოთოლცვენა ტერენტი გრანელის ქუჩაზე“, „თიხის მზე“ და „წვიმის სონატა“ (2014).

რუსთველური სიყვარული

რა ძლიერ შევცოდე, არ უნდა გამეშვი

მე ვგავდი ავთანდილს,

ცრემლებით ვიმღერე,

მწირივით დავდივარ ყორნისფერ ღამეში

და უკან ყვავივით მომჩხავის სიბერე.

ძელქვებმა წუხილის ტოტები დახარეს,

თინათინ! გეძახი მე შენი მელექსე,

ცხრა კუბო წაიღეს მხედრებმა

ცხრა მხარეს,

ამაოდ გეძებდი ტანძიის ველებზე.

მზე მთების უბეში ხელივით შეცურდა,

ფიქრებმა მატირეს,

დამნაცრეს, დამღალეს,

მეც უნდა დავტოვო, წავიდე მეც უნდა,

მეც უნდა დავკარგო სამარე ცხრა მხარეს.

რომ მეტად ვერავინ ვერასდროს იხილოს

თუ როგორ ვასველებ

ცრემლებით ქვიტკირებს,

მოწყვიტავს ქართველი

მინდორში ღიღილოს,

თინათინ!

ქართველი ჩვენს გამო იტირებს.

წყარო

ქართველი პოეტები (ენციკლოპედია)