ღლონტი ვახტანგ

ვახტანგ ღლონტი

ღლონტი ვახტანგ – (1954), ქართველი თეოლოგი და პოეტი, დაიბადა ბათუმში. დაამთავრა ბათუმის შოთა რუსთაველის სახელობის პედაგოგიური ინსტიტუტის ქართული ფილოლოგიის ფაკულტეტი და თბილისის სასულიერო აკადემია. 2004-2006 წლებში ხელმძღვანელობდა საქართველოს მწერალთა კავშირის აჭარის ორგანიზაციას; 2008 წელს აირჩიეს ბათუმის „სახედ“. გამოცემული აქვს კრებულები: „ბოღმა უარყოფილ სულათა“ (1991), „სევდიანი სიმღერა“ (1996) , „Stia Viator“ (2004).

* * *

უნდა მისაგზლოს, როცა მომშივა,

შენ, გინდ რითმით ან ვერლიბრით წერე;

ლექსი არაა, რაც სტრიქონშია,

ლექსი იწყება წერტილის მერე.

ვინ მოარიგა მიწასთან ზეცა,

მეც, რაც მაღრჩობდა, ამოვიმღერე;

ღმერთი არ იყო, ჯვარზე რომ ეცვა,

ღმერთი დაიწყო აღდგომის მერე.

რაც აქ ითქმება, – აქვე დარჩება,

ცოტა მისწვდება საუფლო სერებს;

დაგვიგდონ ფასი – სიტყვის ჩარჩებმა,

მოგვეფერება ცა უფრო, მერე.

არ გასწორდება გრძელი და მოკლე,

გინდაც ვენები გადაისერე;

მე, სიცოცხლეში იმდენჯერ მომკლეს,

უნდა ვიცოცხლო სიკვდილის მერე.

შენც, ვიდრე მახვილს მაძგერებ ფერდში,

პირჯვარი მაინც გადაიწერე;

მერე იქნება, ან – არაფერი...

ან – ყველაფერი იქნება მერე!

წყარო

ქართველი პოეტები (ენციკლოპედია)