ყურაშვილი ცირა
ყურაშვილი ცირა – (1962), მწერალი და პოეტი. დაიბადა ბაღდათში. 1987 წელს დაამთავრა ქუთაისის პედაგოგიური ინსტიტუტის ფილოლოგიის ფაკულტეტი, ქართული ენისა და ლიტერატურის სპეციალობით. გამოცემული აქვს ლექსების კრებულები: „ასფალტის ყვავილები“ (1996), „ანბანური პერიოდი“ (2006), „სამოთხის სარკმელი“ (2013); 2008 წელს გამოსცა მოთხრობების და მინიატურების კრებული. 2011 წელს გამოიცა მისი პროზაული ნაწარმოებების კრებული „ხიზნები კომანის მონასტერთან“, 2016 წელს კი – ნოველების კრებული „ჟამსა თამაშობისასა“ და წერილების, ესეების კრებული „ვინ გაიტანს თეფშებს?!“ 2012 წელს გახდა ლიტერატურულ კონკურს „საბას“ ნომინანტი. 2014 წელს გაიმარჯვა პოეზიის საერთაშორისო კონკურსში. 2015 წელს მისი ლექსები შევიდა გერმანულ ენაზე თარგმნილ ქართული პოეზიის ანთოლოგიაში. 2017 წელს გახდა ლიტერატურულ კონკურს „საბას“ ნომინანტი ნოველების კრებულისთვის „ჟამსა თამაშობისასა“.
- რაბი
- მეტად აღარ დამიძახო რაბი
- ეს გვირაბი არ მთავრდება რაბი
- ეს სიზმარიც არ მთავრდება რაბი
- ეს ეკლებიც არ მთავრდება რაბი
- ჩემი სახე შვიდი მშვიდი გველით
- ჩემს სარკეში ჩახატულ გროტესკით
- შვიდი გველი აძრულია რაბი
- ერთმანეთზე უფრო უბოროტესი
- მეტად აღარ დამიძახო რაბი
- მეტად აღარ მომეფერო რაბი
- ღვარძლჩათესილ
- ხორბალს ვგავარ რაბი
- მე არა ვარ შენი ღირსი რაბი
- მე მეგონა დაგიუნჯე რაბი
- მე მეგონა მტრედებად დაგიუნჯე
- მე მეგონა ჩემი იყო რაბი
- ნეკნებს შორის დარჩენილი სილურჯე
- ღვარძლჩათესილ ყანას ვგავარ რაბი
- ამ ადგილას უდაბურს და მივარდნილს
- ხორბალივით დაგკარგვივარ რაბი
- ხორბალივით ქარში გადაგივარდი
- მეტად აღარ დამიძახო რაბი
- ნუ მომაპყრობ მაგ თაფლისფერ იელებს
- ის ღრუბლებიც შეხორცდება რაბი
- არც სილურჯე აღარც სიცარიელე
- შვიდი გველი აძრულია რაბი
- უკან აღარ მომაბრუნო რაბი
- შვიდი გველით მოვშხამულვარ რაბი
- ნადირივით დევნილი ვარ რაბი
- სულ ციცაბოს სულ ქარაფზე მდგარი
- სულ მძრწოლვარე
- სულ დევნილი ძაბუნი
- მე არა ვარ შენი ღირსი რაბი
- მეტად აღარ დამიძახო რაბუნი.
