შენგელია ალეკო

ალეკო შენგელია

შენგელია ალეკო − (1914 − 1975), ქართველი პოეტი. დაიბადა სოფელ ხაბუმეში (ჩხოროწყუ). სწავლობდა თბილისის სახელმწიფო უნივერსიტეტის ფილოლოგიის ფაკულტეტზე 1930-1933 წლებში. მისი პირველი ლექსი გამოქვეყნდა 1938 წელს ჟურნალში „ჩვენი თაობა”, ხოლო პირველი წიგნი − 1940 წელს. იგი, აგრეთვე, ავტორია ისტორიულ-რევოლუციური პიესისა „ციმბირის პაპა”, რომელიც 1966 წელს ოზურგეთის სახელმწიფო თეატრის სცენაზე დაიდგა. იყო გამომცემლობა „ნაკადულის” მთავარი რედაქტორი, ლიტფონდის დირექტორი. გამოცემული აქვს კრებულები: „წერილი მამას” (1945), „ანბანთ სიმღერა” (1948), „კალმახის გადარჩენა” (1958). დაკრძალულია დიდუბის პანთეონში.

გიყვარდეს წიგნი

გიყვარდეს წიგნი − ძვირფასი განძი,

ცოდნის სარკე და ბუნების კარი,

მთელ ქვეყანას რომ გვიხატავს თვალწინ

და გზას გვინათებს, როგორც ლამპარი!

გიყვარდეს წიგნი, მისი პატარა

ჯარისკაცები − ანბანთ კრებული,

ცოდნის სანატრელ გზით რომ გვატარებს,

ლამაზ სიტყვებად გამწკრივებული!

გსურს ასახელო მშობელი მხარე,

მას ემსახურო საქმით და ფიქრით?

მისთვის წიგნი აგიხელს თვალებს,

ამისთვის უნდა გიყვარდეს წიგნი!

გიყვარდეს წიგნი! − გონების თვალით

რომ სახავს, გვაცნობს ქვეყნის ცხოვრებას!

გიყვარდეს წიგნი და შენი ვალი

ყოველ ნაბიჯზე გემახსოვრება!

წყარო

ქართველი პოეტები (ენციკლოპედია)