ჩიკვაიძე ნუგზარ

ჩიკვაიძე ნუგზარ − (1968), პოეტი. დაიბადა თბილისში. 1985 წელს დაამთავრა თელავის მე-4 საშუალო სკოლა, 1989 წელს კი − თელავის იაკობ გოგებაშვილის სახელობის სახელმწიფო პედაგოგიური ინსტიტუტის ისტორია-ფილოლოგიის ფაკულტეტი, ქართული ენისა და ლიტერატურის სპეციალობა.

სამუშაო გამოცდილება: ქარელის წყალობის წმინდა გიორგის ტაძრის წინამძღვარი; წმიდა ილია მართლის სახელობის სალიტერატურო ჟურნალ „საქართველოს მოამბის” რედაქტორ-გამომცემელი; თელავის იაკობ გოგებაშვილის სახელობის სახელმწიფო უნივერსიტეტის ქართული ფილოლოგიის დეპარტამენტის ასისტენტ პროფესორი.

გამოცემული აქვს ლექსების კრებულები: „სინათლისაკენ“ (1990), „მთის მწვერვალები“ (2003), „თოვს, დედას ძლიერ უყვარდა თოვა“ (2006).

ქალო, წადი პაემანზე!

გორდას მკერდი დაულეწავს,

რაშმა ნისლი გადიყარა,

შემოგხედა და უეცრად

შეუყვარდი ნარიყალას...

თრთოდნენ თმები და თვალები,

სულის ვნება წამწამს იწვა,

მოდიოდი ნათრთოლები

და მოგქონდა ცა და მიწა.

ნისლი − თითქოს დაძრწის მხეცი,

ჩამოამსხვრევს ჰანგებს ლოდად,

დაიმორცხვე... და ციხეცა

მოთმინებით დაგელოდა...

გრიგალის ხმა − ცად დამტკბარი,

უფლის ცრემლში დაევანა,

ნარიყალა, ცა და მტკვარი

ცახცახებდნენ პაემანად.

აგრე რატომ გაენაზე,

გულზე ცეცხლის შემონთებავ,

ქალო, წადი პაემანზე,

ნარიყალა გელოდება!...

წყარო

ქართველი პოეტები (ენციკლოპედია)