ჩრდილოეთის საბჭო
ჩრდილოეთის საბჭო – (ინგლ. Nordic Council), ჩრდილოეთ ევროპის სახელმწიფოთა რეგიონული ორგანიზაცია. შეიქმნა 1952 დანიის წინადადებით (I-ლი სესია ჩატარდა 1953).
ჩრდილოეთის საბჭოს თავდაპირველი წევრები იყვნენ: დანია, ირლანდია, ნორვეგია და შვედეთი. 1955 მის შემადგენლობაში შევიდა ფინეთი, რომელმაც დადო პირობა, რომ არ მიიღებდა მონაწილეობას სამხედრო-პოლიტიკური საკითხების განხილვაში. ჩრდილოეთის საბჭოს წევრ-სახელმწიფოთა თანამშრომლობა ხორციელდება ჰელსინკის კონვენციის 1962 და კოპენჰაგენის შეთანხმების 1971 შესაბამისად ეკონომიკის, კულტურის, სოციალური პოლიტიკის, სამართლის, ტრანსპორტისა და კომუნიკაციების სფეროში.
ჩრდილოეთის საბჭოს ორგანოებია: პლენარული ასამბლეა, რომლის სესია ყოველწლიურად ტარდება, პრეზიდიუმი და კომიტეტები. 1971 ჩრდილოეთის საბჭოს რეკომენდაციების განსახილველად და დასამტკიცებლად შეიქმნა მინისტრთა საკოორდინაციო საბჭო, 1972 – მუდმივმოქმედი სამდივნო. ჩრდილოეთის საბჭოს მოღვაწეობამ ხელი შეუწყო სამართლებრივი ნორმების უნიფიკაციის სოციალური პოლიტიკის სფეროში, სამუშაო ძალის რეგიონული ბაზრის შექმნას, ეკონომიკური და კულტურული თანამშრომლობის განვითარებას.
