ჩხეტიანი მზია

მზია ჩხეტიანი

ჩხეტიანი მზია − (1940), ქართველი პოეტი. დაიბადა სოფელ ღვირიშში (ცაგერი). 1967 წელს დაამთავრა თსუ-ს ფილოლოგიის ფაკულტეტი. მისი ნაწარმოებები იბეჭდება 1965 წლიდან. სხვადასხვა დროს მუშაობდა გაზეთების რედაქციებსა და ტელევიზიაში. მონაწილეობდა სხვადასხვა ლიტერატურულ კონკურსებში. არის 1996 წელს ბავშვთა საერთაშორისო ფონდისა და გაზეთ „ნერგის” მიერ გამოცხადებულ პოეზიის კონკურსის ლაურეატი.

* * *

თითქოს მიწიდან ამოიზარდა...

მოდის ბოხვერა ტყუპი ბოკვრებით;

მან ხომ არ იცის, როგორ გიყვარდა

და ვერც გაიგებს, ისე მოკვდები.

წავლენ... იმ ტკივილს აედევნები,

რაც არსად გითქვამს, არც გიწერია...

თოვს აკაციის თეთრი მტევნები

და ცას, შორეულს, ატმის ფერი აქვს.

ცისკენ მიდიან ვერის ქუჩები

თეთრი დილებით, ბაცი მინდვრებით...

ბინდში ძველ ნაღველს შეეყუჟები

და უნუგეშოდ აქვითინდები.

წყარო

ქართველი პოეტები (ენციკლოპედია)