ცალუღელაშვილი ლევან
NPLG Wiki Dictionaries გვერდიდან
ცალუღელაშვილი ლევან − (1980), ჟურნალისტი და პოეტი. დაიბადა თიანეთში. 2002 წელს დაამთავრა თსუ-ს ჟურნალისტიკის ფაკულტეტი. 1998 წლიდან მუშაობდა ჟურნალისტად სხვადასხვა გაზეთებში, აგრეთვე, რადიომაუწყებლობაში. ავტორია ლექსების კრებულისა „ნაბიჯი გრიგალთა გზაზე“.
- * * *
- არავისი არაფერი მინდა,
- არავისი არაფერი მშურს...
- ის, ვისთვისაც არ არსებობს წმინდა,
- ეცდება და დაგისერავს სულს.
- ფერმკრთალდება ეს ღრუბლები, თალხი,
- თურმე ისევ ემღერება გულს,
- არად აგდებ ჯვარზემცმელი ხალხის
- ქირქილს, ხითხითს, უგვან ჟრიამულს.
- ხარს თუ ქედზე ღვთის უღელი ადგას,
- ცალი რქითაც კი გაავლებს ხნულს,
- ზეცა ისმენს ერთი მერცხლის ლოცვას,
- ააფეთქებს უმალ გაზაფხულს.
- იმზიანებს, დარი შეცვლის ავდარს,
- მიტევება შვენით უფლის მოსავთ,
- ლოცვას, სულის ამ უებარ სალბუნს
- უდაბნოში თავთუხები მოჰყავს.
- მერე რა, რომ შენ არავის ერჩი,
- მერე რა, რომ არავისი გშურს,
- ვიღაც მაინც მიემხრობა ბნელეთს,
- ეცდება და აგიტირებს სულს.
