ცენტროსოიუზის მისია 1920-21
ცენტროსოიუზის მისია 1920-21 – 16.1.1920 ანტანტის უმაღლესმა საბჭომ მიიღო გადაწყვეტილება, ნაცვალგების საფუძველზე დაეშვა საქონლის გაცვლა საბჭოთა რუსეთსა და ამ მიზნით „რუსული კოოპერაციული ორგანიზაციების მიერ ტანსაცმლის, მედიკამენტების, სასოფლო-სამეურნეო მანქანების და პირველადი მოხმარების სხვა საგნების რუსეთში იმპორტის შესაძლებლობა, ხორბლისა და სხვა პროდუქტების სანაცვლოდ“. ამავე დროს, როგორც უმაღლესი საბჭოს გადაწყვეტილებაში იყო აღნიშნული, ეს ღონისძიებები არ ნიშნავდა საბჭოთა რუსეთის მიმართ ანტანტის ქვეყნების პოლიტიკის ცვლილებას, რომლებიც ცდილობდნენ, არ მიეყვანათ საქმე საბჭოთა რუსეთის ოფიციალურ აღიარებამდე. საბჭოთა მთავრობამ, რომელიც ბლოკადის მოხსნას დიდ მნიშვნელობას ანიჭებდა, გადაწყვიტა გამოეყენებინა ეს შესაძლებლობა უცხოეთის ქვეყნებთან სავაჭრო კავშირების დასამყარებლად, ცენტროსოიუზს (მომხმარებელთა საზოგადოებების სრულიად რუსეთის ცენტრალურ კავშირს) უცხოეთის სახელმწიფოებთან ვაჭრობის ნებართვა მიეცა. 1920 წლის მარტში ცენტროსოიუზის დელეგაცია ლ.ბ. კრასინის მეთაურობით კოპენჰაგენში ჩავიდა, სადაც დადო სავაჭრო შეთანხმებები შვედურ ფირმებთან და შეთანხმება შვედეთის მთავრობასთან. სან-რემოს კონფერენციის 1920 შემდეგ გადაწყდა, რომ მოლაპარაკებები „რუსულ სავაჭრო დელეგაციასთან“ ლონდონში გაგრძელდებოდა. ორივე მხარის მიერ გარკვეული ურთიერთპრეტენზიების წამოყენების გამო მოლაპარაკებები მნიშვნელოვნად გაჭიანურდა. მაგრამ მიუხედავად ამისა, 16.III.1921 სავაჭრო შეთანხმების ხელმოწერით დასრულდა.
