ცისფერი ტრიო

„ცისფერი ტრიო“ – ვაჟთა ვოკალური ანსამბლი. ჩამოყალიბდა 1972 თბილისის პოლიტექნიკურ ინსტიტუტთან, როგორც სტუდენტთა თვითმოქმედი კოლექტივი დ. აბესაძის, თ. სეფერთელაძისა და მ. თავართქილაძის შემადგენლობით. 1974-იდან გამოდიოდა როგორც საქართველოს სახელმწიფო ფილარმონიის პროფესიული კოლექტივი (ამ წლიდან ეწოდა „ცისფერი ტრიო“). მის რეპერტუარში ძირითადად ქართველ კომპოზიტორთა ლირიკული სიმღერებია: „ლურჯი აპრილი“, „ღმერთი სიყვარულისა“, „იმერეთის ნიავო,“ „მოგონებანი“, „ქუთაისო“, „ვენაცვალე მაგ შენს თვალებს“, „ფუტკარი“, „ქარი გიმღერის ნანასა“ და სხვ. აგრეთვე ქალაქური ფოლკლორის საუკეთესო ნიმუშები. ტრიოს შესრულებისათვის დამახასიათებელია ემოციურობა, ლირიკული განწყობილება, პროფესიული კულტურა, ეროვნული კოლორიტის გრძნობა. 1988 ანსამბლის სამივე წევრს მიენიჭა საქართველოს სახალხო არტისტის წოდება.

წყარო

• მუსიკის ენციკლოპედიური ლექსიკონი