ჭიოტა
ჭიოტა - Agrostemma githago
ხევს.-აჭა, თუშ.- აჭე, კოკოშა-ბალახი, მესხ. -ჭიჭოტა, ჯავახ. - ჩახჩახა, ჭიჭორა, შავი ჭიჭორა, რაჭ., აჭარ. - ავშნარი, სვან.- ურუხვა
ჭიოტა მიხაკისებრთა ოჯახს ეკუთვნის. ერთწლოვანი სარეველა მცენარეა, მხოლოდ პურეულის (უმთავრესად თავთავიანი პურეულის) ნათესებში გვხვდება და იქ არის გავრცელებული, სადაც პურეულ კულტურებს მისდევენ.
ღერო 40-80 სმ სიმაღლისაა, სწორი, მეტწილად დატოტვილი. ფოთლები ხაზურ-ლანცეტაა ან ხაზური, მოპირისპირედ განლაგებული. ფოთლები და ღერო რბილი გრძელი ბეწვითაა მოფენილი.ჭიოტას ყვავილები საკმარისად დიდი ზომისაა, ღეროს ტოტების ბოლოებში თითო-თითოდ განლაგებული. ყვავილის ჯამი ბეწვითაა მოფენილი, ძარღვებამოზნექილია და ხუთი გრძელი კბილით დაბოლოებული, რომლებიც სიგრძით გვირგვინს აღემატება. გვირგვინის ფურცელი ხუთია, მუქი ვარდისფერია ან წითელი. სვეტი ხუთია, მტვრიანა ათი.
ნაყოფი კოლოფია, რომელიც პურეულთან ერთად მწიფდება და მომწიფებისას ხუთი კბილით იხსნება. თითოეული ნაყოფი ორმოცამდე თესლს შეიცავს. თესლი შავია ან წაბლისფერი, ბორცვებიანი.
