ჯინჭარაძე ია

ია ჯინჭარაძე

ჯინჭარაძე ია – (1973), პოეტი. დაიბადა ამბროლაურში. 1995 წელს დაამთავრა ქუთაისის აკაკი წერეთლის სახელობის უნივერსიტეტის ფილოლოგიის ფაკულტეტი, არაბული ენის და ლიტერატურის სპეციალობით. 2002 წელს – დამასკოს არაბული ენის ინსტიტუტი. 1995 წელს გამოქვეყნდა ლექსების კრებული – „აბორგებული აბორიგენი“. 2006 წელს – „ცა ცვალებადობს“. 2017 – ლექსების კრებული – „მარტივი რიცხვების ანბანი“. ცხოვრობს იტალიაში.

* * *

ეს ამბავი ისეთი სევდიანია

როგორც გადახრუკული სამეფო,

სადაც წვები, რომელიმე ნანგრევთან

და ისიზმრებ მწვანე მინდორს

და იმ უსახელო, ჭრელ ყვავილებს,

თაფლის გემოთი.

ეს ამბავი ისეთი სევდიანია,

როგორც ქარში მოჭრიალე საქანელა,

უხილავი ბავშვებით და ისეთი სევდიანი,

როგორც დიასახლისი,

სანიმუშო და ქანცგაწყვეტილი,

რომელიც დაეძებს ცოტა ღამეს,

რომ გაუღიმოს და უთხრას:

- მეგობარო!

წყარო

ქართველი პოეტები (ენციკლოპედია)