ჰარიშჩანდრა ბჰარატენდუ
ბჰარატენდუ ჰარიშჩანდრა – (სანსკ. भारतेन्दु हरिश्चन्द्र, 1850-1885), ინდოელი დრამატურგი. ჰინდის ენაზე ახალი დრამატურგიის ფუძემდებელი.
პიესები: ტრაგედია „ნილდევი“, სატირული კომედიები „რელიგიის ძალადობას ნუ ჩავთვლით ძალადობად“ და „შხამის საწინააღმდეგო საშუალება თავადაც შხამია“, დრამა მითოლოგიურ სიუჟეტზე „პატიოსანი ჰარიშჩანდრა“, სიმბოლისტური დრამები „ინდოეთის უბედურება“ და „დედა-ინდოეთი“ (და სხვ.).
ადაპტირებულად თარგმნა კლასიკური სანსკრიტული პიესები „ვიდია-სუნ-დარ“, „ჩანდრავალი”, „რატნავალი’” (და სხვ.). მან უარი თქვა „ნატიაშასტრაში“ ჩამოყალიბებულ კანონებზე, შეცვალა ტრადიციული სიუჟეტი და მოქმედ პირთა ხასიათები, უარი თქვა მუდმივ კომპოზიციაზე (ლოცვა-პროლოგი, პირველი მსახიობის შესავალი და დასკვნითი მონოლოგი, კეთილი დასასრული და სხვ.). განახორციელა ენის რეფორმა, ლექსების გვერდით შეიტანა თანამედროვე ჰინდის ლიტერატურულ ენაზე დაწერილი პროზაული ტექსტები. იგი ავტორია თეორიული ნაშრომისა „დრამა“.