ჰერდერი იოჰან გოტფრიდ
იოჰან გოტფრიდ ჰერდერი – (გერმ. Johann Gottfried Herder; დ. 25 აგვისტო, 1744 — გ. 18 დეკემბერი, 1803), გერმანელი პოეტი, კრიტიკოსი და ფილოსოფოსი, რომელსაც ხშირად კულტურული ნაციონალიზმის მამად მოიხსენიებენ. ლუთერან-ღვთისმსახური, ჰერდერი პედაგოგიურ საქმიანობასაც ეწეოდა; მან მთელი ევროპა მოიარა და ბოლოს — 1776 წელს, ვაიმარში დასახლდა, სადაც დიდი საჰერცოგოს სამღვდელოებას ჩაუდგა სათავეში. მიუხედავად იმისა, რომ ახალგაზრდა ჰერდერზე დიდი გავლენა იქონია კანტის, რუსოსა (გვ. 79) და მონტესკიეს ნაშრომებმა, სწორედ ჰერდერი გვევლინება განმანათლებლობის მთავარ ინტელექტუალურ ოპონენტად და სწორედ მან მოახდინა გადამწყვეტი გავლენა გერმანული რომანტიკული მოძრაობის გაძლიერებაზე. ერის როგორც განსხვავებული კულტურის, ენის და „სულის“ მქონე ორგანული ერთობის ჰერდერისეულმა ხედვამ ხელი შეუწყო როგორც კულტურის ისტორიის დისციპლინის ჩამოყალიბებას, ასევე ნაციონალიზმის ისეთი ფორმის წარმოშობასაც, რომელშიც ეროვნული კულტურის თავისთავადი ფასეულობაა ხაზგასმული.
