ჰოპკინსის მისიები სსრკ-ში
ჰოპკინსის მისიები სსრკ-ში – ჰ. ჰოპკინსის ვიზიტით პირველად სსრკ-ს ეწყია (29.VII-I-VIII. 1941) როგორც აშშ-ის პრეზიდენტის ფ. დ. რუზველტის პირადი წარმომადგენელი. მოსკოვში ყოფნისას ჰოპკინსი შეხვდა სახალხო კომისართა საბჭოს თავმჯდომარეს ი. ბ. სტალინს და საბჭოთა მთავრობისა და სამხედრო ხელმძღვანელობის სხვა წარმომადგენლებს.
ჰოპკინსის მისიების ოფიციალური მიზანი იყო სსრკ-თვის აშშ-ის სამხედრო ნაწარმის მიწოდების საკითხის შესწავლა, თუმცა პირველ რიგში მას უნდა გაერკვია, თუ „რამდენ ხანს გაუძლებდა რუსეთი ფაშისტური გერმანიის შემოტევას. საბჭოთა მხარემ ჰოპკინსს დაწვრილებით გააცნო სამხედრო მოქმედებათა მსვლელობა და პერსპექტივები საბჭოთა კავშირ-გერმანიის ფრონტზე. მასვე გადაეცა იმ შეიარაღებისა და საჭირო მასალათა სია, რომელიც სსრკ-ს პირველ რიგში სჭირდებოდა. მოლაპარაკებისას ჰოპკინსმა განაცხადა, რომ აშშ-ისა და ინგლისის მთავრობებს მიზანშეუწონლად მიაჩნიათ სსრკ-გერმანიის ფრონტზე მძიმე შეიარაღების შემოტანა მანამ, ვიდრე არ შედგებოდა სამი სახელმწიფოს წარმომადგენელთა შეხვედრა სტრატეგიული ინტერესების შესწავლის მიზნით. სტალინმა მოიწონა ამგვარი შეხვედრის იდეა.
ჰოპკინსის ვიზიტმა ხელი შეუწყო ამერიკა-საბჭოთა კავშირის ურთიერთობების გაუმჯობესებასა და მოამზადა ნიადაგი სსრკ-ის, აშშ-ისა და დიდი ბრიტანეთის წარმომადგენელთა შეხვედრისათვის მოსკოვში 1941 წლის ოქტომბერში. სსრკ-სა და აშშ-ს შორის მოლაპარაკებათა შემდგომი გაგრძელების შედეგად, სსრკ-ზე გავრცელდა ლენდ-ლიზის კანონის მოქმედება. ჰოპკინსის მეორე ვიზიტი სსრკ-ში, ამჯერად როგორც აშშ-ის პრეზიდენტის ჰ. ტრუმენის წარგზავნილისა, შედგა 25.V-7.VI.1945. საბჭოთა ხელმძღვანელებთან მოლაპარაკებისას. ამჯერად ყურადღება დაეთმო ევროპაში ომისშემდგომი დარეგულირების საკითხებს, კერძოდ, დამარცხებულ ფაშისტურ გერმანიაზე მოკავშირეთა მიერ კონტროლის დაწესების ორგანიზაციულ საკითხებს, რეპარაციებს, გერმანიის სავაჭრო ფლოტის გაყოფას, პოლონეთის მთავრობის ჩამოყალიბებას. საბჭოთა მხარემ დაადასტურა თავისი ვალდებულება იაპონიასთან ომში ჩაბმის თაობაზე.
იხილე აგრეთვე
წყარო
- ქართული დიპლომატიური ლექსიკონი[[კატეგორია:ჰოპკინსის ვიზიტი სსრკ-ში
