წულუკიძე ვარდენ

23:08, 3 თებერვალი 2019-ის ვერსია

ვარდენ წულუკიძე

წულუკიძე ვარდენ გრიგოლის ძე (8.XI.1865 - 21.V.1923) - გენერალი.

სამხედრო მოღვაწეობა

დაამთავრა ჯერ თბილისის კადეტთა კორპუსი, შემდეგ ალექსანდრეს სახელობის მე-3 სასწავლებელი. პოდპორუჩიკი (1885). პორუჩიკი (1889). შტაბსკაპიტანი (1898). კაპიტანი (1900). პოდპოლკოვნიკი (1905). პოლკოვნიკი (1910). პირველი მსოფლიო ომის მონაწილე. 1914 წლის ნოემბრამდე 208-ე ქვეითთა პოლკშია. 1915 205-ე პოლკის მეთაური. დაიჭრა და გადაყვანილ იქნა კავკასიის ოლქის შტაბში. გენერალ-მაიორი (1916).

1918-1921 წლებში მსახურობდა საქართველოს შეიარაღებულ ძალებში. 1918 წლის დეკემბერში, სომხეთთან ომის დროს, იყო სამხედრო სამინისტროს პიროვნული შემადგენლობის განყოფილების უფროსი. 1919 წლიდან მე-3 ბრიგადის (ახალციხეში, იცავდა სამხრეთ-დასავლეთის მიმართულებას) მეთაურია. 1921 დაინიშნა ზურგის არმიის მეთაურად. 18-20 მარტს გ. მაზნიაშვილთან ერთად, განდევნა ქემალისტები ბათუმიდან.

საქართველოს ბოლშევიკური ოკუპაციის შემდეგ ემიგრაციაში არ წასულა. სამსახური განაგრძო წითელ ჯარში. იყო ანტისაბჭოთა აჯანყების მოსამზადებელი სამხედრო ცენტრის ერთ-ერთი ხელმძღვანელი. სამხედრო ცენტრის სხვა წევრებთან ერთად დახვრიტეს, დღევანდელი ვაკის პარკის ტერიტორიაზე.

ჯილდოები

• (1907) წმ. ანას მე-3 ხარისხის ორდენი;
• (1911) წმ. სტანისლავის მე-2 ხარისხის ხმლები;
• (1915) წმ. ვლადიმირის მე-3 ხარისხის ხმლები;
• (1915) წმ. ვლადიმირის მე-4 ხარისხის ხმლებით და ბაბთით. იარაღით.

მიხეილ ბახტაძე

ლიტერატურა

• Русская армия в Великой войне;
• М. Гогитидзе, Военная элита Кавказа, т. 1, 2007;
• ა. ჩაჩხიანი, დაშნაკთა ნაციონალისტურ-ექსპანსიონისტური იდეოლოგია და სომხეთ-საქართველოს 1918-1919 წლების ომი, თბ., 2007.

იხილე აგრეთვე

ბიოგრაფიული ლექსიკონი

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი