ბიბილაშვილი ზაზა

მიმდინარე ცვლილება 23:07, 8 აპრილი 2022 მდგომარეობით

ზაზა ბიბილაშვილი

ბიბილაშვილი ზაზა – (1972), ქართველი ჟურნალისტი, მწერალი და პოეტი. დაიბადა სოფელ კარალეთში (გორი). 1994 წ დაამთავრა თსუ-ს ჟურნალისტიკის ფაკულტეტი. სხვადასხვა დროს იყო: პრესის და სამხედრო ჟურნალისტი, რედაქტორი; სატირულ-იუმორისტული ტელეპროგრამების ავტორი, რედაქტორი და სცენარისტი; კინოსცენარისტი. ავტორია პოეტური, პროზაული და ესეისტური კრებულებისა: „ნუ მესიზმრები, რაა!“ (ლექსები, 1999), „ჩემი მდოგვის მარცვალი“ (ლექსები, 2009), „კონგო ანუ ზაირი“ (ნოველები, 2014), „პოეზია, დანარჩენი ლიტერატურა, და დანარჩენი“ (ჩანაწერები, 2016), „ფაზლი“ (ლექსები, 2018).

ასე იციან

დაგღლის ტანის დივანზე და

ლოყის მკლავზე შემოდება,

გარეთ გახვალ, ნახავ,

შენი შემოდგომა გელოდება –

ძველებურად ფერყვითელი,

სუნსველი და გემომწიფე

ფეხქვეშ ისევ დაძენძილი

ნოხის ნაფლეთს შემოგიფენს –

ნიავქარში სადარბაზოს

ღია კარში შემოხვეტილს,

და გგონია, გარეთ იყავ –

სახლში ახლა შემოხვედი –

სადაც შენი სული ფხიზლობს

ან ფხიზელი ძილით სძინავს,

შემოსულხარ რაკი შარშან,

იმის წინ და წინის წინაც,

შენი დარდის ეკალ-ბარდით,

შენი ომით, შენი ნდომით,

და ამანაც შეგიფარა,

თანაც – მთელი შემოდგომით...

გული აგიჩუყდება და

მოგივა და შეგიხტება –

ასე იცის შემოდგომამ –

შეგიჩვევს და შენი ხდება.

მაგრამ განა მარტო მაგან –

ყინვის ეტლით ნასერი ცის

ზამთარმა და გაზაფხულმა

და ზაფხულმაც ასე იცის.

ასე იცის ამქვეყანამ,

სათნოა თუ მურდალია –

თავის პანოს, ხვატით დამწვარს

თუ ყინულის სუდარიანს,

პროზის მსუყე საფლობებს თუ

პოეზიის მიმქრალ ტონებს

შეგაჩვევს და შეგიჩვევს და

მერე უცებ მიგატოვებს

[რედაქტირება] წყარო

ქართველი პოეტები (ენციკლოპედია)