ლომიძე თამარ

მიმდინარე ცვლილება 13:54, 23 მარტი 2022 მდგომარეობით

თამარ ლომიძე

ლომიძე თამარ — (1969), პოეტი და მხატვარი. სწავლობდა თსუ-ს ფილოლოგიის ფაკულტეტზე, რომელიც 1993 წელს წარჩინებით დაამთავრა. თამარ ლომიძის პირველი პერსონალური გამოფენა და პოეზიის საღამო მოეწყო 1993 წელს. გამოცემული აქვს კრებულები: „მოვედი, ერთი სიტყვა რომ მეთქვა” (1995), „ჟამი კვირტობის”, „ზღვარი”, „მე სხვა ცას ვეძებ”. 1995 წლიდან თარგმნის; ნორვეგიული ენიდან თარგმნილი აქვს საბავშვო ნაწარმოები — თურბიორნ ეგნერის საბავშვო წიგნი „კარიუსი და ბაქტუსი” (2010), აქტიურად ეწევა ქართული კულტურის პოპულარიზებას საზღვარგარეთ.

დ. ა. -ს

ქარში იფრინა ჩემმა თოლიამ,

ცაში აუშვა სულის აფრები...

რაც კი უბეში ცეცხლი მქონია

ზღვას შეალეწა ამაყი ფრთებით...

გზაარეული ნისლივით შესვა

მთაში დაჭრილი ირმის ბღავილი...

იასამნების მომიძღვნა ზეცა

უფლის თვალით თუ ქარვის ყვავილით.

დამამსხვრევინა ძვლების გალია,

ამაშლევინა ხარაჩოები...

- ახია ჩემზე!.. და ალალია...

შემოსეული ყაყაჩოები!

[რედაქტირება] წყარო

ქართველი პოეტები (ენციკლოპედია)