ნამკაშური

00:24, 9 აპრილი 2024-ის ვერსია

ნამკაშური – პატარა მდინარე-ხევია ლეჩხუმში ცაგერის მუნიციპალიტეტი. ნამკაშური ჩამოუდი სოფელ ლუხვანოს და მიერთვის მდინარე ცხენისწყალს (მარჯვ. შენაკადი). ნამკაშური აქ ადგილის სახელადაც არის დადასტურებული. შესანიშნავი სტრიქონები უძღვნა ნამკამურის ღელეს ანა კალანდაძემ:

„ნაკადულზე ჩამოსულან

ნამკაშურის წისქვილები“.

აქაურ მცხოვრებთა შორის ფართოდ არის გავრცელებული გადმოცემა იმის თაობაზე, რომ სახელწოდება ნამკაშური თითქოს ნაკაშიძეების გვარს უკავშირდებოდეს: ძველად ეს ადგილები ნაკაშიძეების კუთვნილი ყოფილა, მათ სჭერიათ და ასეთი სახელიც ხალხს მიტომ შეურქმევიაო. გადმოცემა უთუოდ საინტერესოა, მაგრამ უფრო მიზანშეწონილად გვეჩვენება მისი სვანური ნაკ („ვაკე) სიტყვისაგან მომდინარეობა. სვანურში ნაკ- სიტყვის მიხედვით არაერთი გეოგრაფიული სახელია წარმოქმნილი.

არანაკლებ საინტერესოდ გვეჩვენება ადგილობრივი (ლეჩხუმური) სიტყვა ნამკაშო (ნაკვაშე), რაც ნიშნავს. „იფნის მოჭრილი უვარგისი ყლორტები“ (მ. ჩიქოვანი). „ნამკაშოს გამოაცლიან გადაბელილ ხეს გაზაფხულზე; იფანზე რამდენიმე საჭიგოე ტოტს დატოვებენ“. თუ ტოპონიმის ამოსავალ ფორმად ლეჩხუმურ ნამკაშოს ვივარაუდებდით, მაშინ ნამკაშ-ურ-ი უნდა განგვემარტა როგორც „გადასაბელი იფნის ხეებით მდიდარი ადგილი“.

წყარო

ქართულ ტოპონიმთა განმარტებით-ეტიმოლოგიური ლექსიკონი